EDITORYAL - Saludo gihapon kang Gazini

Angay dayegon ug mosaludo sa Talisaynong si Gazini Ganados nga nagrepresentar sa Pilipinas sa 2019 Miss Universe kagahapong adlawa bisan pa man og dili siya maoy nakabitbit sa korona.

Si Ganados gidayeg Malacañang tungod sa gipakita niining kaisog ug haom nga ehemplo sa usa ka Filipina.

Samtang tuod labing maayo unta kun nahimo pang “back to back” sa Pilipinas ang kadaogan angay dawaton nga duna pay nilabaw kang Gazini adtong tungora.

Naila na kaayo ang mga Pilipino kun unsa kini mosuporta sa ilang mga kababayan nga mo-compete sa kalibotan, sa text palang kaniadto ug karon pinaagi social media dili mabiyaan ang Pilipinas.

Tungod sa kadako sa pangagpas sa uban sa kadaugan ni Gazini, miabot pa ang uban sa puntong ilaha naman hinuong gi-bash si Gazini kay wala makuha ang korona. Maayo ang suporta apan usahay sobra ra kaayo ug makadaut na hinuon.

Dili lalim ang sakripisyong gihimo ni Gazini aron makatungtong sa maong entablado nga diin halos tanang kababayen-an nangandoy bisan nalang og sa makadiyot makaapil sa maong indigay.

Mao sab kini ang gibuhat sa South African nga si Miss Universe 2019 Zozbini Tunzi nga maoy nakoronahan, mao nga di makiangayon nga siya tamayon tungod sa kolor sa iyang panit ug dagway.

Ang tubag ni Tunzi sa pangutana makapatandog ug makapahinuklog sa mga nakadungog. May kalabotan kini sa katungod sa mga kabataang babaye ug ang ilang papel sa katilingban; kun unsay kuwang sa matag usa sa pagatiman sa kinaiyahan nga karon nakasinati og na climate change.

Ang Pilipinang si 2018 Miss Universe Catriona Gray ang nisuot sa korona kang Tunzi.  Angay hinumdoman nga ang South African sab nga si Demi Leigh Nel-Peters nga Miss Universe 2017 mao sab ang nagpasuot sa korona ni Catriona.

Ang Pilipinas usa sa mga nasud sa kalibotan nga dunay daghang nakadaog sa Miss Universe, Miss World, Miss Earth ug uban pang prestihiyosong indigay sa kaanyag.  Kana palang angay ng ikapasigarbo ni bisan kinsang Pilipino.