Illegal swertres gipasagdan ra
RENBOR PATROL - Rene U. Borromeo (Banat) - October 24, 2019 - 12:00am

Duna ko’y mga kaila nga gusto gyud nga adto sila mopusta sa illegal swertres kay mas dagko kuno og dibidendo kay sa legal nga swertres.

Nagpasabot kini nga nagpadayon ang operation sa illegal swertres sa Dakbayan sa Sugbo, apan wala gyud kita makadungog nga may gihimo ang kapolisan kabahin niini.

Akong nahibaw-an nga ang mga legal nga swertres operators, kining nagpadagan sa Small Town Lotteries (STL), mireklamo na ngadto sa kadagkoan sa Philippine Charity Sweepstakes Office (PCSO).

Gani si PCSO General Manager Royina Garma nakadawat usab og mga reklamo gikan sa publiko nga wala makauyon sa pagkuyanap sa illegal swertres dinhi sa siyudad.

Dili lang nako ibutyag ang mga ngalan sa mga tawo nga nalambigit sa illegal swertres, apan anaa kini sa suwat ni ma’am Garma nga iyang gipadala sa bag-ong regional director sa Police Regional Office-7 nga si Brigadier General Valeriano de Leon.

Unta, si General De Leon mohimo og kamandoan ngadto sa iyang mga city ug provincial directors dinhi sa Central Visayas, nga mohimo sila og paspas nga kampanya batok sa illegal swertres ug ubang matang sa ilegal nga sugal.

Kon dili mohimo og hugtanay’ng kampanya ang mga polis, mahimong makatuo na kita nga may katinuoran ang mga report nga niabot sa PCSO nga may mga opisyal sa kapolisan nga nagdawat og payola gikan sa mga tigpasiugda og ilegal nga sugal.

Kinahanglan nga si Koronel Gemma Vinluan momando sa iyang mga sakop nga dili na kay magkiyugpos lang ug pasagdan lang ang nga ilegal nga sugal.

Tan-awa ra gud, usa ka operator og illegal swertres gusto unta nga mosuborno og P60 mil ang kada buwan ngadto kang Major Chuck Barandog.

Subornohan unta nila si Barandog kay bisan og wala na kini madestino sa Sugbo, apan giisip man nila nga “power” kini kay tua na man madestino sa PCSO.

Maayo nanlang gani kay gibalibaran ni Major Barandog ang tanyag kay giisip niya nga dakong tamparos kaniya ang pagdawat nga ang PCSO man gani maoy mangusog sa pag-awhag og kampanya batok sa illegal swertres.

Dinhi, angay na nga molihok si Mayor Edgardo Labella kay ang Republic Act 8551 klaro kaayo nga naglatid nga ang mga mayor maoy gitahasan sa pagsuperbisar sa kampanya batok sa illegal nga sugal.

Tinuod, mas dako-dako ang madaog kon adto ka mopusta sa illegal swertres, apan alkanse kaayo ang publiko niining maong tinonto kay ang mga tigpasiugda niini wala magbayad og buhis sa gobiyerno.

Kon mawagtang ang illegal swertres, adto ra ang katawhan mopusta sa mga legal nga STL ug makadawat og bahin ang kagamhanan sa ilang operasyon nga magamit alang sa pagpatuman og lainlaing mga proyekto nga kapahimuslan sa katawhan.

Unta, si Mayor Labella motuman sa gilatid sa Republic Act 8551.

SMALL TOWN LOTTERIES
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with