Kapritso
LINTUNGANAY - Fred Languido (Banat) - October 10, 2019 - 12:00am

Gipahibawo ni Cebu City Mayor Edgardo Labella nga makadawat og bag-o nga mga sakyanan  ang tanang sakop sa Konseho lakip na kadtong dili niya kaalyado sa politika. Gawas sa brand new nga mga sakyanan, iyang hatagan ang matag-konsehal og kaugalingong consultant.

Dunay 18 ka sakop ang konseho apil na ang duha ka mga ex-officio member nga maoy representante sa Association of Barangay Councils (ABC) ug Sangguniang Kabataan (SK). Sa ato pa 18 ka bag-o nga mga sakyanan ang kinahanglang paliton sa dakbayan alang sa mga konsehal wala pay labot ang alang sa mayor ug sa bise mayor.

Susamang gidaghanon usab sa mga consultants ang kinahanglang sweldohan sa dakbayan aron makaabag sa mga konsehal sa ilang gimbuhaton walay labot sa mga staff sa ilang tagsa-tagsa ka buhatan. Sigun ni Labella gusto niya nga pickup truck ang ihatag sa mga kosehal apan mag-agad ni sa kabubut-on sa matag sakop sa konseho kun unsay ilang gusto.

Kun tumanon ang gusto ni Labella nga apuran og pickup truck ang 18 ka mga konsehal, mogasto ang syudad og gikan sa P25 milyones ngadto sa P30 milyones kun ang ilang paliton mao ang labing barato nga klase sa pickup nga gibaligya karon sa merkado.

Samtang ang suholan sa consultant dili sab moubos sa P18 mil matag buwan, depende unsa sila ka suod sa mga opisyal sa dakbayan. Sa ato pa kinahanglang mogasto og labing minus P324 mil matag buwan ang dakbayan sa ilang  sweldo.

Angayan nato nga pahinumduman ang mayor nga dili ni iyang personal nga kwarta ang gamiton pagsweldo sa mga consultants ug pagpamalit sa ilang kapritso. Pasayloa nga kapitso ang pulong akong gigamit tungod kay wala man gyud kinahanglana ang brand new nga mga sakyanan alang sa mga konsehal.

Hain man diay ang mga sakyanan sa mga konsehal kaniadto? Nganong dili man kadto maoy ilang gamiton? Nagkinahanglan ba gyud og brand new nga mga sakyanan ang mga konsehal aron sila mamahimong epektibo sa ilang trabaho?

Sa pikas bahin, nganong magkinahanglan ang mga konsehal og consultants? Dili ba panahon sa kampanya labihan man nilang nakapangatik sa katawhan nga sila maoy pilion kay sila maoy labing takos ug maantigo sa trabaho?

Ang tinuod political accommodation maoy mahitabo niini tungod kay bisan og susihon dili mga eksperto ug takos mamahimong consultant ang kuhaon sa mga konsehal kon dili mga suod nga higala ug supporter sa politika.

Hinaut makaamgo si Mayor Labella nga igo lang siyang gipiyalan sa mga magbubuhis ug dili mahimong iyang iwaldas ang buhis sa katawhan sigun sa iyang kabubut-on ug kapritso sa politika.

KAPRITSO
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with