Gipatay pag-usab

Walay kabutangan sa kasakit ug kapait sa mga tagtungod sa mga nabiktima sa linoog nga krimen.

Apan mas sakit kon ang mga kriminal nasilotan na unta apan nahatagan og kagawasan.

Sama sa nahitabo sa magsoong Maryjoy ug Jacquiline Chiong nga nabiktima sa heinous crime.

22 ka tuig ang nakalabay dihang gidagit gilugos gipatay ug gihulog sa bung-aw sa Tan-awan Guadalupe sa Carcar ang magsoong Chiong.

Nadakpan ang walo ka mga responsable apan ang usa gihimong state witness, samtang ang pito gipahamtangan og silot kamatayon apan nahimong life sentence human gi-abolish ni kanhi Presidente Arroyo ang death penalty.

Medyo nahupay ang kasub-anan kay lagi nasilotan naman ang mga kriminal bisan og nagdugo gihapon ang samad sa ilang kasing kasing.

Nahugno ang kalibutan sa magtiayong Chiong dihang nasayran nga nabuhian na diay ang tulo sa Chiong 7 nga silang Josman Aznar, Ariel Balansag, ug Alberto Caño.

Kini gumikan sa good conduct time allowance diin napaubsan ang ilang sentensya tungod sa pagbinuotan sa bilanggoan.

Maayo nalang kay nanginlabot si Presidente Duterte nga mimando sa pagpadakop sa tanang mga naka avail sa GCTA nga mga heinous criminals.

Nakaginhawa na ang mga tagtungod sama sa mga Chiong nga nakaingon nga naa gyud diay hustisya.

Ang pangutana mailhan pa kaha sa mga otoridad ang nawong sa mga nakagawas nga posibleng adunay dakong kausaban tungod sa kadugay na sa panahon?

Bahala na ang mga otoridad sa paghimo sa ilang tahas pagbalik kanila sa bilanggoan.

Mosanong kaha ang mga konbiktado sa panawagan sa presidente? aw sila na ang mag-igo basta gibaharan na sila sa pangulo.

Matud pa ni Mr. Chiong nga mas maayong motahan nalang sila kay sa matukhang pa sila sa mga tawong naglagot kanila.