EDITORYAL - Hotline 911 libre na gyud

Sumala pa sa pagtuon, daghan na kaayong mga Pilipino ang nagbaton og mga cellphones. Ang selpon nahimo ng kabahin sa mga importanteng gamit nga bitbiton sa mga tawo sa inadlaw-adlaw nilang kinabuhi sama sa sapot nga ilang gisuot.

Samtang gamit kini sa komunikasyon apan dili ang mga emergency hotlines sa gobiyerno kaniadto sama sa 911, 117, 160, 166 ug uban pang hotlines nga gamiton panahon sa emerhensiya. Kaning 3-digit hotline numbers mas sayon ug dali rang matiman-an sa tanan, apan subo lang nga way gamit ang cellphone aron ma-dial kini kun nagkinahanglan og tabang ang usa ka cellphone users.

Apan niining bag-o lang ang Department of Interior and Local Government nipahibalo nga mahimo nang matawgan ang emergency hotline nga 911. Libre kini sa mga mogamit, apan silotan kadtong magyaga-yaga niini.

Upat ka telecommunication companies ang nisanong sa maong tahas. Kini mao ang PLDT, Smart Communications, Sun Cellular, ug Talk N’ Text. Nagpasabot nga kadtong mga subscribers aning mga telco pa ang makagamit sa maong serbisyo sa gobiyerno.

Ang Globe Telecom Inc., gipaabot pa sab nga mosanong sa maong serbisyo kay kondili posibleng may epekto kini sa ilang kitaon tungod kay ang emergency hotline dili ikalimod dako og matabang sa mga cellphone users bisan og dili pa nila kini kinahanglang gamiton.

Ang pagsanong sa maong mga telcos subay kini sa Executive Order No. 56 nga gipagawas sa pangulo niadtong tuig 2018.  Basta gamiton lang kini sa matarong ug dili maabusohan dunay maayong benepisyo nga makuha ang publiko gikan niini ilabi na para sa kaluwasan sa mga minahal sa kinabuhi.

Husto sab nga estriktuhon ang paggamit niini aron walay magbugalbugal ug makaingon hinuon og kahasol sa mga otoridad. Kadtong masakpang nagyagayag sa emergency hotline makapaabot gyud nga pasakaan og kasong paglapas sa Presidential Decree (PD) 1727.

Ang maong balaod mosilot niadtong mga makalapas nga pagkapriso og lima ka tuig o ba kaha pamultahon og dili molapas P40 mil o depende nalang sa korte kun pilay multang ipahamtang kanila.