EDITORYAL - Hain na ang minibuses

Makapahibulong karon ang pipila ka mga barangay dinhi sa Dakbayan sa Sugbo, hain naman diay ang mga barangay minibuses nga gipamalit kaniadto para magamit sa ilang mga konstituwente ilabi na sa mga estudyante?

Karon daghan sa mga estudyante ilabi na sa mga bukirang barangay ug bisan gani dinhi sa siyudad ang naglisod sa ilang pag-adto sa mga tunghaan karong nagbukas na og balik ang klase tungod sa kadaghan sa manakay sayo sa buntag.

Samtang sa bukirang mga barangay diin lisud ang dalan, ang libreng transportasyon para sa mga tinun-an dako na og tabang kanila.

Ang mga barangay sa North District adunay mga minibuses nga gikan sa proyekto ni Kongresista Raul del Mar nga gigamit sab paghatud og mga estudyante padung sa downtown area aron mapaduol sa mga tunghaan.

Dako kaayo kadtong natabang sa mga bata ug mga ginikanan kay di ma-late sa ilang pagsulod sa klase. Apan tulo ka tuig na karon nga wala na makita pagbalik ang maong mga mini buses nga maghatud og mga tinun-an.

Nangaguba na kuno ang minibus. Apan makapahibulong kay may mga minibuses sa ubang barangay ang nagdagan pa ug gipaabangan pa.

Ang rason sa uban wala silay budget aron mapaayo ang maong mga sakyanan?  Apan nganong ang ubang barangay nga gamay ra og income nakamentinar man lagi sa maong mga minibuses apan kadtong mas dagko og income wa man hinuoy pangpa-repair sa ilang mga sakyanan?

Dili ba diay prayoridad sa mga barangay officials ang ilang transportasyon? Nganong adto lang man sila magsalig sa motorpool sa siyudad sa pagpaayo ug pagpalit og piyesa nga unta lehitimo man kini nga gastos sa usa ka LGU?

Unsa diay ni, maayo lang modawat unya dili mogasto pagmentinar ug pagpaayo kun maguba ang mga hinatag nga sakyanan diha sa mga barangay?

O tungod ba kaha sa pamolitika mao nga lisud na gamiton ang inisyatiba sa mga barangay officials?