Way overtime pay og 13th month pay

Dear Atty. Divine,

Usa ko ka guwardiya  og na-assign sa usa ka business establishment. Mo-duty ko sud sa 12 ka oras everyday ug way overtime pay. Two years nako nga nagtrabaho ning maong agency ug di sab mi nila hatagan og 13th month pay. Sa dihang naningil mi sa among agency sa 13th month pay  ug overtime pay giingnan mi nga dili daw mi entitled og overtime pay ug 13th month pay kay wa kini nalatid sa among kontrata nga gipirmahan. Ang akong pangutana, tinuod ba nga dili mi makadawat og overtime pay ug 13th month pay kay wa kini mabutang sa  among contract? Unsay angayan namo nga buhaton? Daghang salamat. —Lito

Dear Lito,

Kanang overtime pay og 13th month pay nalatid kana sa atong balaod busa dili kana kinahanglan nga ibutang  pa sa employment contract  kay automatic na kana nga ma-avail sa usa ka trabahante bisan pa kun regular ang employee or  dili. Buot ipasabot nga kun ang usa ka empleyado motrabaho sobra sa walo ka oras matag adlaw kinahanglan gyud siyang bayran og overtime pay sa sobrang oras nga iyang gitrabahuan. Samtang kalabot usab sa 13th month pay, basi sa balaod mandatory kini ug kinahanglan nga mohatag ang employer og 13th month pay on or before December 24. Busa ang maayo nimong buhaton mao ang pagpasaka og reklamo ngadto sa DOLE batok sa imong agency aron ila kining mapatawag  tungod sa kapakyas niini paghatag sa inyong benepisyo. Thanks and God bless.— Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.