EDITORYAL - Unsay para kang Juan?

Nakabiya na sa Pilipinas si Chinese President Xi Jinping human sa iyang duha ka adlaw nga state visit dinhi diin adunay mga kasabotan nga gipirmahan tali sa ilang gobiyerno ug sa gobiyerno sa Pilipinas.

Sumala pa nga 29 ka mga kasabotan ang gipirmahan nila ni Presidente Rodrigo Duterte ug  DFA Secretary Teddy Locsin Jr. ug nilang Xi ug Chinese Foreign Minister Wang Yi.

Sa 29 ka mga kasabotan, tulo niini ang para sa Davao. Samtang ang labing dako mao ang joint oil exploration sa duha ka nasud ug kasabotan bahin sa imprastraktura.

Apan daw wala sa ilang plano nga tukion ang kabahin sa mga gipanghimo sa China diha sa West Philippine Sea tungod kay wala may kasabotan nga gipirmahan gawas lamang sa paguyon nga kinahanglang kanunay ang komunikasyon aron dili masipyat nga moresulta sa giyera.

Parehong nagtuo ang duha ka nasud nga nibugnaw na ang tensyon sa South China Sea (WPS) tungod sa kooperasyon sa Pilipinas ug China uban sa mga sakop sa ASEAN Member States ug pareho silang maninguha nga maimplimentar ang Declaration on the Conduct of Parties in the South China Sea (DOC).

Samtang maayo ang tumong sa mga kasabotan apan kinahanglang masayod niini ang katawhan aron mapapas ang mga pagduda tungod sa pakigsuod sa presidente ngadto sa maong nasud.

May punto ang mga kritiko sa pangulo tungod kay daghang Pilipino ang nagduda ug diskompiyado gyud sa motibo sa mga China.

Makabenepisyo gyud tinuod ang mga Pilipino sa maong mga kasabotan kon matinuod gyud. Apan gikinahanglang prayoridad sa gobiyerno mao ang interes sa katawhan ug dili para sa pipila lamang.

Sa pakighigala palang sa Pilipinas dako na kaayo ang benepisyo nga nakuha sa China tungod kay naibanan gamay ang hunahunaon niini nga bantayanan diha sa WPS.

Ang pangutana karon kon unsa man kaha ang para sa mga Pilipino?