UNDASPAT sa PDEA

Gawas sa kapolisan, LTO, ug LTFRB, nag aktibo usab ang Philippine Drug Enforcement Agency PDEA sa mga kalihokan sa Kalagkalag.

Kon wala ko masayop murag karon pa ni sila misalmot sa mga kalihokan sa adlaw sa mga minatay sanglit ang pagtoo sa kinabag-an nga sa illegal nga drugas sila nakatutok.

Tinood man ang illegal drugs ang ilang target busa mas gihingusgan ug gipahugtan sa PDEA ang ilang operasyon batok sa illegal drugs.

Sakto sad ang paglihok sa PDEA nga mihimo sila og random inspection sa mga pantalan ug airport nga maoy gidagsaan sa mga pasahero.

Mismo si PDEA Regional Director Wardley Getalla ang nangulo sa ilang operasyon.

Dala nila ang mga K9 Unit nga maoy misimhot sa mga bagahe sa mga pasahero aron masuta kon anaa ba kiniy mga sulod nga kontrabando lakip na ang illegal nga drugas.

Posible baya gyud nga adunay makalusot nga mga kontrabando sa mga entry points bisan pa man sa kahigpit nga pag bantay sa mga tagdumala niini.

Hinoon walay nakita nga kontrabando atol sa random inspection sa naasoyng ahensya.

Gipasabot ni Getalla nga proactive ang ilang gihimo aron maseguro nga dili magamit ang okasyon sama sa kalagkalag sa pagpalusot og mga kontrabando.

Maayo unta og ma sustain kini sa PDEA dili lang panahon sa mga espesyal nga okasyon kon dili bisan unsa nga adlaw.

Gipasabot hinoon sa opisyal nga limitado ang ilang manpower, apan himoon kuno nila ang mga operasyon nga mao usay gisangon kanila.