Sirkus na usab sa Senado

Ang serye sa mga pagpatay dinhi sa lalawigan sa Sugbo midakop sa atensiyon ni Senadora Grace Poe kinsa mopasaka kuno karong adlawa og resolusyon sa Senado alang sa usa ka imbestigasyon sa maong mga pagpatay.

Gumikan niini, makapabot kita nga mo-starring sa usab ang atong mga pulitiko. Tungod kay duol na ang sunod nga eleksiyon, daghan kanila ang mobira sa oportunidad pagplastar sa ilang kaugalingon sa telebisyon panahon unya sa Senate inquiry.

Ambot kon gikinahanglan pa ba ang imbestigasyon sa Senado sa mga pagpatay dinhi sa Sugbo. Kay sigun sa atong nahibaw-an, dili lamang dinhi ang mga pagpatay kondili nahimo kini nga ordinaryong panghitabo sa nasud.

Kini dihang sukad nga misutoy ug walay hunong nga gipakusgan ang kampanya sa kagamhanan batok sa negosyo sa ilegal nga druga dihang milingkod si Presidente Rodrigo Duterte sa katungdanan sugod kaniadtong 2016.

Siguro nasentro karon ang tanang atensiyon sa Sugbo gumikan lagi kay ang probinsiya may gitumbok ni Duterte nga nag-una sa mga lugar diin naghitak ang druga.

Gani pasangil sa presidente sa niaging mga bulan nga halos tanang pulis sa Sugbo ang nalambigit sa maong ilegal nga negosyo.

Apan unsa ba gayud ang makuha nga maayong bunga gikan niining maong lakang pagsusi sa mga pagpatay dinhi sa Sugbo?

Makatabang ba kaha usab kini pagsulbad sa mga kaso sa ubang patay sa nasud?

Basin baya kon usa na usab kini ka sirkus diin pulos magpalabwanay sa papel ang mga partisipante.

Dili ba nga mao man kana ang kasagarang mahitabo kon adunay ipahigayon nga House o Senate inquiry?

Sa akong tan-aw usik lamang sa panahon ug resources kining mao nga imbestigasyon sa Senado. Kadudahan kon adunay makutlo nga bag-ong ideya ang mga magbabalud nga angay ikatabang sa ilang pagpanday og balaud may kalabotan sa maong isyo.

Hinuon dili kalikayan nga magpa-pogi points lamang ang ubang magbabalud atol sa maong hearing, ilabina nga nagsingabot na ang piniliay sa Mayo.