Duola ang kapolisan

Hangtod kanus-a kutob ang pagpadagan og bus aron mohatod-kuha sa mga call center agents nga naa magtrabaho sa IT Park ug mga silingang lugar?

Ang pagpadagan og bus desisyon ni Mayor Tomas Osmeña human sa iyang pakigtagbo sa mga lider sa BPO industry nunot sa kamatayon sa usa ka Lorraine Temple nga call center agent. Si Temple giingong misukol sa dihang gilabni ang iyang bag sa duha ka tulisan nga nagmotor diha sa Barangay Mabolo.

Nakapangutana ko hangtod kanus-a magdagan ang mga bus tungod kay nahibalo kita nga gikinahanglan ang gasolina o krudo aron ipadagan sa mga bus. Asa man kini kuhaa?  Kon ang kagamhanan sa siyudad ang pagastuhon sa gasolina o krudo sa mga bus, nagkinahanglan kini og minilyon nga pundo aron ipadagan sa mga bus. Asa man kuhaa ang minilyon?

Mosugot kaha ang mga BPO sa IT Park nga mag-amot-amot aron igasto sa operasyon sa bus system aron ihakot sa ilang mga trabahante?

Pananglit abagahon sa siyudad ang tanan o tipik sa gasto, dili na ba kinahanglan ang pananghid sa konseho? Mosugot kaha ang COA niini?

Hinuon gitataw sa mayor nga padayon pa ang iyang pakigkonsulta sa BPO industry kalabot ning iyang plano paghakot pinaagi sa bus sa mga call center agents.

Daghan og hikutahonon ang kagamhanan sa siyudad. Puwerteng daghanang mga barangay nga molubog sa tubig baha bisan diyutay lang ulan. Hangtod karon, adunay mga barangay sa siyudad nga maglaundok sa mga eskina ang mga basura, kini bisan sa minilyon nga pundo nga giabang sa mga trak nga manghakot niini, balor sa pundo gikan sa siyudad nga mas dako pa kay sa nagasto pagpanghakot og basura panahon ni Mike Rama. May mga lugar nga kinahanglan dungagan og mga enforcer tungod sa panaghuot sa trapik, sama sa Mambaling area.

Pero nganong busy man sa paghikutar anang call center nga aduna pa may daghang problema ang siyudad nga nagkinahanglan sa dinaliang pagtagad?

Ang nahitabo ni Temple usa lamang sa mga krimen nga nanghitabo sa kadalanan sa siyudad. Sa Colon namalik ang mga isnatser ug manghingiay. Nagkagrabe ang drugas, ug ebidensiya niini ang one time big time nga operasyon sa kapolisan mga mipatay og  mga nalambigit sa negosyo sa drugas.

Para nako, miepekto sa kahusay ug kalinaw sa siyudad ang pagpakig-away ni Tomas sa kapolisan tungod sa iyang kasuko nga ang anti-drug operations nila miigo sa iyang higala nga kanhi kapitan sa Tejero.

Nganong dili man siya makig-alayon sa kapolisan aron papatrolyahan sa mga unipormadong kapolisan ang IT Park area?  Kanang gasolina o krudo nga iyang itubil sa mga bus nga ihatod-kuha sa mga call center agents nganong dili naman lang na idugang sa kapolisan nga naglisod karon kay sumala pa sa kanhi deputy for administration sa Cebu City Police Office gilisudlisod sila sa ilang assistance gikan sa Cebu City Hall sama sa fuel.

Ang siyudad nagkinahanglan sa abag sa kapolisan aron mapatunhay ang kahapsay ug kalinaw ug malayo sa krimen ang katawhan. Sa samang paagi, ang kapolisan nagkinahanglan sa abag sa kagamhanan sa siyudad tungod kay limitado ang logistics support gikan sa ilang headquarters.

Busa, tambag nako kang Tomas: duola ang kapolisan ug hangyoa nga magpatrolya sa mga lugar nga tag-as ang kriminalidad. Ug subay niini, suportahi sila ug ayaw lisudlisora aron makalihok pag-secure sa tanan nimong mga konstituwente sa 80 ka barangay sa siyudad, dili lang mga call center agents.

Sa laktod nga pagka-estorya, gamiton sa saktong kagamitan ang rekurso ug pundo sa kagamhanan. Niini, likayan ang paggamit niini sa mga butang nga gigamit sa pagpasikat ug pogi points sa Facebook.

Kini aron lang gyud ingnon nga adunay gibuhat.