Milagro punoan sa kahoy?

Usa ka murag imahen o bayhon kuno ang milakra sa punoan sa Mahogany sa barangay Punta Engaño sa Dakbayan sa Lapu-Lapu nga gidagsa karon sa mga tawo.

Anaa ra kini sa daplin ra gyud sa karsada diin matud pa sa matood nga nakasaksi niini, imahen kuno sa Mahal nga Birheng Maria.

Usa ka 40 anyos ang unang nakadiskubre sa giingong imahen kinsa nangangkon nga gipadamgo sa Mahal nga Birhen mahitungod sa panghitabo.

Matud niya sa sinugdanan dili siya makatoo tungod kay dili man siya hinimba ug dili sab aktibo sa pagtulon- an sa relihiyong katoliko.

Gani gibugalbugalan pa siya sa iyang bana nga basin og nabuang tungod sa pangangkon niini sa nakita nga imahen.

Samtang misugod na dayon sa pagdagsa ang mga tawo, dunay nanguryoso duna usay namasin nga pamation ang ilang pangamuyo sa inahan sa Dios.

Sagad gyud sa nangadto kadtong mga dunay balatian nga nagtinguha nga maayo pinaagi sa milagro.

Dili na kini bag-o pa nga sugilanon kay daghan nga miracle story kuno ang nakapaukay sa mga tawo.

Naa kaniadto ang imahen sa Senyor Sto. Niño sa bayanan sa pawikan, imahen nga naghilak apan wala kini kalawata sa simbahan.

Matud ni Fr. Amado Bacotot, Team Moderator sa Sto. Niño de Mactan Parish nga taas ug kuti ang proseso ayha isipon nga tinood ang aparation o usa ka milagro ang panghitabo.

Hinoon wala niini gisalikway nga posibleng adunay intercession ang mahal nga inahan sa mga kasinatian o masaksihan sa katawhan.

Apan gikinahanglan nga magmatngon ug dili dayon magpalingla tungod kay basin usab binuhatan kini sa pikas kampo nga nagtinguha nga mahisalaag ang mga tawo.

Tinood man o dili, ang mahinungdanon nga gamiton kini sa pagpalig on sa pagtoo ngadto sa Ginoo.

Inay sa motutok ug moyukbo sa punoan sa kahoy, mas maayo seguro nga mobalik sa simbahan maminaw ug pamation sa kasing kasing ang pulong sa Ginoo.