Super minority

Nagkaguliyang na ang partidong PDP-Laban human mapulihi sa pagka Speaker of the House si Congressman Pantaleon Alvarez.

Naghinayhinay na usab sa pagpanglayat ngadto sa partido ni Davao City Mayor Sarah Duterte ang mga sakop sa gitawag og super majority sa Kongreso.

Dili madugay, ang mga balimbing, o political butterfly, maglumbaanay na unya kini sa pagpanglupad ngadto sa partido nga giporma sa anak ni Presidente Duterte.

Dili nato ni ikatingala tungod kay mao gayud kini ang mahitabo sa huyang nga sistemang politikal.

Dinhi sa atong nasud, maoy gipatigbabaw ang gitawag nga “politics is addition” mao na nga ang mga partidong politikal gipabarug sa huyang nga pundasyon nga mao ang politics of accommodation.

Tungod sa politika nga gibase sa akomodasyon naporma sa Kongreso ang super majority nga gilangkoban sa mga sakop sa laing mga partido nga naglumbaanay sa pagpanglupad paingon sa PDP-Laban nga maoy partido nga gisakyan ni Presidente Duterte sa iyang pagbiyahe paingon sa Malakanyang.

Apan karon, ang super majority paingon na kini sa pagka super minority. Ang politika nga gipabarug sa akomodasyon, ug dili sa prinsipyo sa partido, dili gayud magdugay.

Sa politika man gud, sa akomodasyon ang personal nga interes sa politiko ang gipatigbabaw mao nga kon maapektohan na gani ang iyang interes, tulin ang iyang pagbiya. Dili sama sa partido nga gipabarug base sa prinsipyo.

Ang partido nga gipabarug base sa prinsipyo, lig-on og dili matarug tungod kay ang interes man sa partido ang gipatigbabaw ug dili ang sa mga sakop niini, mao nga anaa ang kahiusahan para sa partido ug dili sa usa ka tawo. Mao ni ang wala pa gayud dinhi sa Pilipinas.

Ang katawhan sa Pilipinas may gikatampo pud hinuon sa pagkahuyang sa partidong politikal tungod kay gipili man nila ang mga politiko nga walay mga prinsipyo ug baruganan mao nga nagtuo lang pud ang mga politiko nga husto sila sa ilang gihimo.