Umento sa suholan
SAKSAK SINAGOL - Lucky Malicay (Banat) - June 13, 2018 - 12:00am

Aniay maayong balita alang sa mga mamumuo sa Central Visayas. Ang buhatan sa Regional Tripartite Wages and Productivity Board mipagawas na og desisyon nga nag-usbaw sa suholan sa mga trabahador sa rehiyon.

Sa maong desisyon, ang mga trabahador sa Class-A nga mga lugar makadawat og P20 nga umento sa inadlaw nila nga suweldo.

Kadtong mga mamumuo sa lugar nga Class-B, C ug D, makadawat og usbaw nga P15 kada adlaw.

Maayo ang mao nga order sa regional wage board tungod kay lakip gayud kadtong gagmay nga mga negosyo.

Gani gimandoan man niini kadtong mga establisimento nga dunay ubos sa 10 ka trabahante sa pag-usbaw og P10 sa suholan sa ilang mga kawani.

Ilalum sa klasipikasyon sa RTWPB-7, ang Class-A naglangkob sa mga dakbayan sa Carcar, Cebu, Danao, Lapu-Lapu, Mandaue, Naga, and Talisay ug mga lungsod sa Compostela, Consolacion, Cordova, Liloan, Minglanilla, ug San Fernando. Ang maong mga lugar nahisakop sa Metro Cebu.

Kadtong anaa sa Class-B mao ang mga siyudad sa Toledo ug Bogo, ug ubang mga lungsod sa probinsiya sa Sugbo. Hinuon, walay labot niini ang mga munisipalidad sa mga isla sa Bantayan and Camotes.

Ang mga lugar ilalum sa Class-C mao ang mga siyudad ug kalungsoran sa mga lalawigan sa Negros Oriental ug Bohol samtang ang Class-D naglangkob sa mga lungsod sa mga isla sa Camotes ug Bantayan sa Sugbo ug probinsiya sa Siquijor.

Hinuon dili kini maayo nga balita alang sa pipila ka labor organization nga hagbay ra nga miduso og dako nga kantidad sa umento sa suholan sa sektor sa mga mamumuo. Alang kanila, insulto kini nga desisyon sa wage board.

Sa niaging mga bulan, mipasaka og petisyon ang Associated Labor Unions-Trade Union Congress of the Philippines alang sa P120 nga umento sa suholan sa mga trabahador sa pribadong sektor sa rehiyon.

Ang Cebu Labor Coalition, NLM-Katipunan, Metaphil Workers Union ug Unionbank Employees Association mihandos usab og P155 nga usbaw.

Apan mas maayo na lang kining mao nga desisyon sa regional wage board kay sa miabin kini sa mga negosyante kinsa dakong supak sa mga petisyon sa maong mga grupo.

Sa pagtaas sa mga presyo sa nag-unang mga palaliton, angay lang nga usbawan ang suholan sa mga mamumuo.

 

 

SUHOLAN
Philstar
Facebook
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with