Bulilyaso sa Comelec

Generally peaceful ang miaging eleksiyon sa barangay ug sa SK, bisan tuod sa ginagmay’ng kakulian pagtultol sa presinto ug pagpangita sa ngalan sa mga botante. Worse, walay mi-asistir kon asa kita paingon.

In my case, I was on my own. Walay CIMPEL, walay NAMFREL, ug walay tinugyanan nga gitudlo sa Comelec aron unta dili masaag ang mga botante.

Anyway, problema na ni sa mga botante. It seems nga wala nay labot ang Comelec niini. Mao kini ang problema matag eleksiyon, ug wa gyud kini ma-corrected sa Comelec.

Ug alang kanatong mga senior citizen, ang labing daku nga bulilyaso sa Comelec mao ang paghatag og kasayon pagbotar sa mga senior citizen, sa mga mabdos ug sa mga PWDs, pinaagi sa pag-provide og special voting precincts sa ground floor sa mga voting centers.

Kahinumdom ko nga dihay mga eleksiyon nga ang akong presinto didto sa third floor sa tunghaan sa Guadalupe. Pastilan, ka-walay kaluoy sa Comelec.

Hinuon, na-corrected kini sa succeeding nga mga eleksiyon. Hinumdom ko nga dihay eleksiyon nga diha sa ground floor gi-assign alang sa mga senior citizen, mga mabdos ug PWDs, regardless sa sityo nga among gigikanan. Lipay kaayo ko.

Apan, sa miaging eleksiyon, daghang senior citizen ang nagbagulbol, ug daghan ang wala na lang mobotar, kay naglisud nag saka sa third o fourth floor.

 Ang nakaparat ug nakapakataw-anan kay samtang ang mga senior citizen gipasaka sa mga andana sa building, ang mga SK, meaning ang mga batan-on nga lig-on pa kaayo’g mga tuhod, diha sa ground floor mabutang. Pastilan. Hinaut nga sa sunod tuig nga eleksiyon, dili na kini mataligam-an sa Comelec. Tungod ba kaha sa ilang ka-busy nga walay bisan og usa lang nga taga-Comelec ang nahinumdom niini? Grabe pud!

Ug nia pa, daghan ang na-disqualified nga mga kandidato tapos sa eleksiyon. Kini tungod kay sila gyud didto sa kaulohan ang mi-review sa mga COCs sa tibuok nasud. Naabtan sila sa eleksiyon. Wala diay sila mosalig sa ilang mga Comelec registrar dinhi sa mga lalawigan, dakbayan ug kalungsoran? Sila ray kamao didto sa kaulohan? It’s time we go Federal!

Karon, kon imong amigo ang nagkaatbang nga mga kandidato, mahimo diay nga dili ka kinahanglan mobotar. Madawat ba kini nga excuse sa balaud? Kon sa matag eleksiyon, imong suod nga higala ang mga nagkaatbang nga kandidato, dili na lang gyud ka mobotar, bahala nag mapapas ang imong ngalan gikan sa talaan sa mga botante?