Lorega naproblema gyud sa drugas
RENBOR PATROL - Rene U. Borromeo (Banat) - April 28, 2018 - 9:06pm

Nasubo kaayo ko pagkasayod gikan sa akong amigong polis nga grabe na gyud diay ang problema sa ilegal nga drugas sa Barangay Lorega-San Miguel, dakbayan sa Sugbo. Duna man diay igsuon sa usa ka konsehal sa Lorega nga nadakpan sa kalambigitan niini sa ilegal nga drugas.

Nagpakisusi ko niini sa kaila nako nga taga Lorega ug akong nasayran nga gipangita man gani diay kuno sa kapolisan ang anak sa maong opisyal. Misamot ang akong kasubo kay nahibaw-an pa gyud nako nga karong bag-o lang, may lain na usab nga igsuon og konsehal sa Lorega nga nasikop tungod gihapon sa drugas.

Para kanako, anha gyud ni mohan-ok ang tanang pangutana kang Kapitan Fritz Herrera kon ngano nga mora’g misamot na man gyud karon ang problema sa ilegal nga drugas sa Lorega-San Miguel. Kaniadtong 2007 sa paglansar ni Fritz pagka konsehal, No. 1 siya sa Sitio Kaimito nga didto ko nagpuyo sulod sa 10 ka tuig.

Kaniadtong miaging semana, nakabisita ko sa gipuy-an nako kaniadto, ug akong nahibaw-an nga may mga lumolupyo na nga mipadayag og kasagmuyo ni Fritz.

Nabuak na ang ilang pagsalig. Didto gani nako mahibaw-i nga mikatap man diay ang mga video karera sa Lorega sa nanglabay’ng mga buwan, ug bag-ohay lang nga mihinay.

Matud pa nga may mga tanod pa nga nagproteksyon niini mao nga wala gayud mahilabti. Sa ingon niini nga sitwasyon, ang kapitan angay gayud unta nga mohimo og mga lakang, apan pakyas si Fritz sa paghimo’g mga paagi nga momenos ang problema sa drugas ug sugal.

* * *

Diha nga misuwat ko sa isyu kabahin sa Barangay Lorega sa miaging semana, daghan ang mipadala og kasayuran kanako. Nagpaabot na hinoon ko nga sama kaniadto, dunay mosaway, ug nahibawo na ko kon asa gikan kining mao nga mga pagsaway, kon mahitabo man.

Tambag nga inamigo nako kang Kapitan Fritz mao nga sutaa ang kalihokan sa imong mga kaubang opisyal. Ayaw sab dayon pagtuo sa mga report lang nga wala’y basehanan kay mahimong giintriga ka lang.

Pareho gud sa akong gihimo nga dihang may polis nga mihatag nako og inpormasyon, ako dayon nga gihimoan og pakisusi pinaagi sa akong mga kaila sa Lorega.

* * *

May mireklamo usab kanako kabahin sa pagbahinay sa mga lote diha sa Lorega human niadtong dakong sunog. Dili kuno patas ang pagbahin kay may mga opisyal sa barangay nga gipangulohan ni Fritz nga nakakuha og dagkong pwesto bisan og sila dili mga tag-iya og balay nga nasunog. Tinuod dili? Hisgotan ta ni sa sunod.

DRUGAS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with