Diha sa pagtrabaho
Usa sa mga gimbuhaton nga gitahas sa tawo sa kalibutan mao ang pagtrabaho. Sa maong paagi mabuhi ang tawo ug diha magasukad ang klase sa kinabuhi. Hamugaway ba, arang-arang o rabanit ba. Nagdepende kini kung unsa ang pagbati ug tumong sa tawo sa pag-ampo ug paglahutay aduna gayod tsansa nga mouswag ang pagpuyo. Apan kung ang tumong sa pagtrabaho mao lamang ang paglingaw ug pagkab-ot sa luho sa kinabuhi may purohan nga marabanit gayud ang tawo. Ang uban nitrabaho nga wala nagsapayan sa kadako sa iyang madawat, kung dili sa iyang gugma ug pagmatuod sa kaugalingon nga aduna siya’y katakos sa maong gimbuhaton ug diha mabati niya ang katagbawan sa iyang nahimo. Apan kung ang kataspok sa tawo ang nagpasulabi mahimo siyang dili matinud-anon sa iyahang trabaho ug gani mahimo kining mitsa nga makapaunlod kaniya. Matod pa sa Ginoo, buhata ang imong mabuhat kay ako na ang magpuno.
- Latest