Tapulado Hired killer kaanggid ni Dimas
JAV BANATI - Javier Yntig Tapulado (Banat) - April 16, 2018 - 12:00am

Dili tanang hired killer puthaw’g kasingkasing. May pipila diay kanila nga kaantigo pud maluoy. Sama sa nahitabo niining bag-o lang nga usa ka self-confessed hired killer wala mopatay sa tawo nga ipapatay unta kaniya kay nakonsensya.

Nakadawat na gani siya og katunga sa P30 mil nga ibayad kaniya, apan bisan pa niini, wala niya dayona sa pagpatay ang babaye nga iyang patyonon kay nasuta niya nga kini relihiyosa ug buotan.

Samot na gyud nga sa iyang pagkakita sa ginang, kaamgid kini og hitsura sa iyang pinangga nga inahan. Dali ra gyud siya nga nalukmay ug nakahukom nga dili na ipadayon ang pagpatay sa babaye. Segun sa pamahayag sa hired killer, dili siya dihadiha nga motrabaho sa buot ipabuhat kaniya. Iya gyud usa nga susihon daan kon maayo ba ang tawo nga ipapatay sa nagsugo kaniya, kon badlungon ba kini sa katilingban? Oras nga iyang matino nga daotan, diha pa niya tirahan ug hunosan sa kinabuhi.

Nahinumdom na hinuon ko sa duha ka tulisan, sila si Dimas ug Estas, nga gilansang sa krus sa masi’g ka kilid ni Kristo Hesus, diin luyo sa himalatyong takna sa ilang kinabuhi, gilarawan nila ang duha ka matang sa dagway ning kinabuhi: Ang magpabiling makasasala, o ang pagbag-o sa kinabuhi?

Si Estas, bisag duol na ang kamatayon, nagpadayon sa pagbugalbugal sa atong Manluluwas pinaagi sa pag-ingon: “Kon anak ka sa Diyos, luwasa ang Imong kaugalingon, ug luwasa usab kami!”

Sa tumang kaaghop, gibadlong ni Dimas si Estas: “Ayaw’g pag-ingon niana, bay. Makatarunganon nga kita ilansang sa krus kay tinuod man kita nga mga kriminal. Apan kining tawo nga anaa sa atong tunga, bisan diyotay, wa gyu’y buling ni gamay’ng mansa sa sala.” Ug sa tumang pagbasol ug pagpaubos mihangyo: “Ginoo, hinumdomi intawon ako kon ikaw atua na sa langit.”

Ingon niini sab ang nahitabo sa hired killer. Dihang nasuta, nga ang ipapatay sa iyang mastermind usa ka buotang ginang, nangayo siya’g pasaylo niini  ug mitahan sa iyang kaugalingon ngadto sa mga magbabalaod dinhi sa yuta. Bahala na’g unsay mahitabo, wala siya mahadlok kay gisalig na man niya ang tanan sa Ginoo.

Mga mahal namong Banat News readers, timan-i. Si Kristo Hesus wala moanhi sa kalibutan aron pagsilot. Kon dili, aron pagluwas natong mga makasasala.

SELF-CONFESSED
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with