Buhis sa katawhan
TIKDOL SA PORDOY - John Rey Saavedra (Banat) - March 23, 2018 - 12:00am

Nabasahan nako sa Facebook ang reklamo ni Mayor Tomas Osmeña nganong wala pang-aprobahi ang iyang mga proyekto sa siyudad sa Sugbo atol sa full council meeting sa Regional Development Council (RDC-7).

Ang mayor nagkanayon: “leave my projects alone.” Sa ato pa nga pinulongan, buot sa mayor nga aprobahan sa RDC-7 ang iyang mga proyekto. Kon tan-awon, makapangutana gyud kita unsa’y nahitabo sa mga giduso nga mga proyekto alang sa siyudad sa Sugbo.

Ug kon paminawon nato ang mayor, makapamalikas gyud kita sa RDC-7 kay nganong wala aprobahi ang mga proyekto alang sa siyudad sa Sugbo. Kining mga proyektoha maoy giabogaran ni Kongresista Raul del Mar didto sa RDC-7, apan mi-walkout kay wala ihatag ang iyang gusto nga aprobahan deritso ang mga proyekto nga wala magsubay sa proseso.

Kining mga proyektoha mao ang hilabihan katag-as nga tunnel, kun underpass nga molagbas gikan sa Iglesia ni Cristo sa General Maxilom Avenue paingon sa Talamban. Adunay gikan sa Salinas Drive paingon sa pier 4, ug aduna pa’y uban.

Sumala pa ni RDC-7 Infrastructure Development Committee Chair Glenn Soco nga wala mahasubay sa masterplan ang maong mga proyekto. Adunay mga expert studies ang JICA, Metro Cebu Development Plan (MCDP) I ug II ug Metro Cebu Land Use and Transport Studies (MCLUTS).

Apan ang Department of Public Works and Highways (DPWH-7) mi-insert niining mga proyektoha sa ilang plans, actions, and programs (PAPs) aron paaprobahan sa RDC-7, bisan wala mag-agi og feasibility study ug wala mag-agi sa Infrastructure Development Committee.

Unsa may tuyo ni Del Mar nganong gideretso og paaprobar sa RDC-7? Aron pit-on ug presyuron ang liderato sa RDC-7? Ug kon dili aprobahan dayon kay iagi usa og feasibility study moreklamo dayon?

Basin nakalimot ug atong pahinumdoman si Mayor Osmeña nga gikan sa buhis sa katawhan ang gastuhon nianang mga proyektoha. Busa, dili kami mosugot nga ingnon lang og “leave my projects alone.” Wala gyu’y problema kon ang mga politiko basin og nag-apas sa komisyon ug SOP sa mga proyekto ug aron adunay magamit sa eleksiyon. Pero por dios, subaya lang ang proseso.

Mao bitaw nga wala aprobahi ang mga proyekto nga gi-walkoutan ni Del Mar kay wala kini mag-agi og pagtuon. Tan-awa ninyo kanang Natalio Bacalso-F. Llamas underpass project, nagka-letse-letse na tungod kay wala mag-agi og pagtuon. Gipatuman lang deritso kay tingali mitiyabaw na ang kontraktor nga dili mabawi ang komisyon nga nahatag na sa politikong nangomisyon. Kon kinsa na, ihunghong lang nako.

Tinuod nga gibotaran sa katawhan si Del Mar ug Osmeña. Pero dili lisensiya para nila ang botos sa katawhan aron ilang gunitan ang dunggan sa RDC-7 nga moaprobar lang sa ilang mga proyekto bisan dili mag-agi sa proseso. Dugay na kaayo mo sa gahum, pero inyong proyekto batok sa trapiko tagna-tagna lang gihapon.

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with