Natural nga remedyo sa goiter (1)
Nakasulay na ba kita, o kaha nakakita ka na ba’g tawo nga gi-goiter? Kon wa kita makasiguro, sagad ato ni maobserbahan nga mora’g dunay burot o bugon o hubag, sa ubos nga bahin sa liog.
Nga matud pa ni Dr.Axe, kumon kini nga sakit didto sa Amerika, nga motakboy kini nga walay gipiling edad, nga hasta ang bag-ong nahimugso, nagkaproblema na sa goiter.
Ilabi na sagad ‘sab sa maigo ini, mga babaye nga 40 pataas na ang edad, dako ang ilang tsansa nga matugkan og goiter sa liog. Aduna ni’y duha ka klaseng goiter uban ang mga hinungdan ini, apan sagad gyud ang pagbugol sa liog gumikan kay nidako ang ‘thyroid gland.’
Niining kondisyona, kumon nga mosamot ang mga isyu sa panglawas. Usahay, sa temporaryong isyu, mawala ra ning walay itambal. Apan kon klaro na gyud nga goiter na kini, nagkinahanglan na nga maatiman dayon. Dili na hulaton nga mograbe pa unya ang problema sa pagpaalibyo sa goiter.
Motumaw ang goiter kon ubos o kulang sa ‘thyroid hormones’ (hypothyroidism) o sobra kadaghan sa thyroid hormones (hyperthyroidism). Basta mayabag na ang trabaho sa ‘thyroid gland’, mao gyud ni ang hinungdan sa goiter.
Apan sagad gyud nga hinungdan mao ang kakulang sa iodine. Malikayan ang goiter kon kanunay iapil sa pagkaon o sa diyeta nga dunay ‘iodine.’
Susihon nato pag-ayo, ang goiter nga mosangpot sa problema sa thyroid, ug unsay maayong aksyon sa pagsanta ug pag-alibyo ini. Unsa ba gyud ning goiter?
Sigun sa American Thyroid Association, usa ni ka abnormal nga pagtubo sa ‘thyroid gland’. Nagporma kini nga gamay nga kabakaba (butterfly), nga kon motubo ni, magkadako ang bugol sa ilawom o kaha gawas sa liog.
- Latest
