Peligrosong desisyon sa Ombudsman Visayas

Nakalingkawas si Mayor Tomas Osmeña sa kasong gisang-at batok kaniya ngadto sa Ombudsman Visayas tungod sa pag-appoint og duha ka acting mayors niadtong Hulyo 2016. Gipakawalay sala sa Ombudsman Visayas si Osmeña kay matud pa dili daotan ang pagbutang og duha ka acting mayors.

Sa iyang resolusyon, si Graft Investigation and Prosecution Officer II Anton Callao nagkanayon nga wala kaprobar si Aniceto Canturias unsa’y kadaot nga nahimo ngadto sa kagamhanan sa siyudad sa Sugbo sa gibuhat sa mayor pag-appoint og duha ka acting mayors.

Si Callao nagkanayon nga ang balaod (Section 3 (e) sa Akta Republika 3019, kun Anti-Graft and Corrupt Practices Act, nga gi-cite ni Canturias dili mahimong gamiton batok kang Osmeña. Na hala, mao man kaha na!

Apan tay’m pa, base sa resolusyon ni Callao nga giaprobahan sa Deputy Ombudsman for the Visayas, ang mga mayor mahimo na diay mo-appoint og duha ka acting mayor kon mo-leave sila sa ilang katungdanan.

Kuyaw kining resolusyon ni Callao nga sundon na hinuon unya sa mga mayor aron sa paglikay sa tulobagon kon adunay mga milagrong panghimuon samtang wala ang mayor kay nag-leave.

Kining gihimo ni Callao, makahatag og kagubot sa mga lokal nga kagamhanan unya kon ang mayor motudlo og duha ka acting mayors kay nag-ingon ang Ombudsman Visayas nga mahimo ra kaayo kini. Usa pa, dili lang ang graft and corrupt practices ang angayang lilion ni Callao, kun dili, ang mahimong kalibog kon kinsa ang ilhon nga acting mayor nga mahimong mamirma sa mga dokumento sa siyudad. Ug kanang kalibog nga mahimo, igo na kana nga makadaot sa operasyon sa usa ka lokal nga kagamhanan.

Si Osmeña, niadtong Hulyo 21, 2016, miisyu og Memorandum 2016-0732 nga nag-designate kang Bise Mayor Edgardo Labella ug kang OIC City Administrator Veronica Morelos isip parehong mga acting mayors samtang wala siya sa katungdanan.

Ibutang nato nga silang duha ni Labella ug Morelos mahimong makapamirma samtang wala si Osmeña, apan karon pa ko niining kalakiha nga kon mawala ang elected mayor, duha ang i-appoint nga acting mayor.

Wala kini mahiuyon sa naandan. Kay bisan asa ka sa kalibutan, usa ra man gyud ang lider sa usa ka organisasyon. Kay kon daghanon, o duhaon, magyagaw ang mga tawo kon kinsa’y sundon. Kini usab hinuong Deputy Ombudsman for the Visayas nga si Elmer Clemente tinudlo man kini ni kanhi presidente Noynoy Aquino, kauban ni Osmeña sa Liberal Party.

Mao bitaw nga ang mga reklamo sa mga kapitan batok sa mayor tungod nianang iyang mga tinudlo alang sa Barangay Mayor’s Office wala na isang-at sa Ombudsman kay hadlok sila nga totyoon ra ni Clemente ang kaso.