Ang baliktad sa bakuna

Tungod sa sakit nga dengue nga dala sa lamok nga mikutlo na og daghang kinabuhi, ang gobiyerno sa Pilipinas milusad og gubat batok niini.

Kay milusad og gubat, ang taming sa gobiyerno aron dili madutlan kon maigo man, usa ka taming nga gipalit sa gobiyerno ug kini mao ang bakuna nga gitawag og Dengvaxia nga mibalor og P3.5 bilyones.

Kay naniguro nga dili maigo sa sakit nga dengue, gidali-dali sa pagtaod ang taming nga Dengvaxia ngadto sa 750,000 ka bata nga nag-edad og 9-14 anyos sa pipila ka pinili nga dapit sa nasud.

Ang mga ginikanan sa mga minor de edad nga natusokan sa bakuna, nagtuo na gyud nga nakaginhawa na sila sa ilang kabalaka nga mataptan og dengue ang ilang mga anak.

Apan balit-ad kay ang naghimo mismo sa bakuna mipahibawo man nga makapagrabe diay hinoon sa dengue kon ang nahatagan sa injection wala pa gyud matakboyi og dengue sukad-masukad.

Ang Dengvaxia mohupas na karong Mayo sa sunod tuig apan dili na kini puyde nga ipangtusok tungod sa ka peligro niini. Karon unsaon man ang mga nahibiling bakuna nga dili na man kini mahimong gamiton?

Ang akong sugyot, i-uli ang mga bakuna ngadto sa naggama niini og bawion ang gibayad sa gobiyerno ug patubagon ang mga opisyal nga nagdanghag sa ilang katungdanan. Mao kini ang angayan nga himuon sa gobiyerno. Sa ingon niini, mabuking usab ang tinonto sa pagpalit sa mga bakuna nga pwerteng pagkamahala. Ako nagtuo nga dili P3.5 bilyones ang nadawat nga bayad sa nagbaligya sa mga bakuna.

Labing seguro katunga ra sa maong kantidad ang ilang nadawat kay ang katunga niini, labing seguro gibahin na sa nagpasiugda sa proyekto, o ba kaha kabahin sa pagpangita og pundo para sa kampanya sa eleksiyon mao nga gidalidali ang proyekto. Wala ko namasangil dinhi, ako lang kining mga pagtuo. Kon nasayop man ako pasayloa ko, pero kon husto ko, nakatag-an diay ko.