“Feelinnial o milennior”

Dakong hagit natong mga ginikanan kon unsaon ang pag-agak sa mga anak sa pagsubay sa dalan nga gusto nato nilang subayon.

Alang sa uban, sayon ra kini apan dili kini ang reality, ilabi na karon nga mura’g aduna na’y kaugalingon nga kalibutan ang mga bag-ong tubo.

Tingali, gumikan sa daghan nga mga factor nga naglibot kanila ug sa environment nga ilang gilihokan.

Dawaton man nato ug sa dili, mao kini ang kamatuoran, sila ang gitawag nga millennials kuno, kinsa adunay mga kaugalingong sinultian ug expression nga dili makasakay ang mga naanad sa kinaraan.

Bitaw, isip ginikanan, dili kita mahimong diktador sa atong mga anak sa ilang pagabuhaton nga mosangpot na hinoon nga sila maghunahuna nga kita ang mga kontrabida.

Himoon nato nga mosulod sa ilang kalibutan aron masabtan ang ilang batasan ug magamit nato sa pagdala kanila sa maayong dalan.

Kon sila mellinnial, kita usab pwedeng mahimong “milennior”(milennial nga senior) o ba kaha “feelennial”(feeling millennial).

Sa ingon niini, magkasinabtanay ang mga ginikanan ug mga anak nga mura’g managhigalaay. Kon adunay problema ang mga anak, bukas na silang mosulti tungod kay bukas man usab kitang maminaw.

Malikayan nga iluom na lang sa anak ang problema nga mosangpot sa dili maayong panghitabo. Sama na lang sa pagkutlo sa kaugalingong kinabuhi sa usa ka grade 12 student nga miambak sa ikapito nga andana sa ilang tunghaan.

Kon unta gisuportahan ug gihatagan sa pagsabot sa mga ginikanan, kon unsa man ang problema sa anak, wala unta mahitabo ang trahedya.

Ginikanan lagi kita, pero kinahanglan usab kita nga mosabot sa atong mga anak sanglit usa ka higayon niagi usab kita sa dalan nga gisubay sa mga bag-ong tubo.