EDITORYAL - Risgo sa media

Human sa upat ka adlaw nga Journalist Safety Training nga gipasiugdahan sa Center for Media Freedom and Responsibility (CMFR) ngadto sa mga editors sa mga media outlets dinhi sa Sugbo, nakita ang daghang kakuwangan nga makaparisgo sa mga reporters ug cameramen atol sa mga peligroso nila nga assignment.

Ang mga senior editors sa lima ka mantalaan nga ania magbase sa Sugbo nga nakasalmot sa mao nga pagbansaybansay, pulos g’yud mapasalamaton nga nadugangan ang ilang kahibawo sa mga angay’ng himoon kon moabot ang panahon nga sila mopadala og mga reporters alang sa usa ka special coverage aron dili mabutang sa kakuyaw ang ilang mga kinabuhi.

Tukma g’yud ang gihimo sa kadagkoan sa CMFR nga nagpasiugda niadtong mao nga kalihukan atol nga ang mga media sa Sugbo nagsaulog karon sa Press Freedom Week. Ang duha ka langyaw’ng security experts maoy gikuha sa CMFR aron mohatag og kahibalo sa mga sakop sa media dinhi sa Sugbo kon unsay angay’ng himoon sa higayon nga moabot ang mga sitwasyon.

Giangkon sa mga media leaders nga nakatambong sa mao nga journalist safety training nga dako g’yud ang pagkuwang sa mga plano diha nga adunay mga reporters nga gipadala didto sa Inabanga, Bohol atol nga nahitabo ang gubat tali sa mga sakop sa Abu Sayyaf ug sa tropa sa kagamhanan.

Ang pagresponde og usa ka hitabo nga wala’y preparasyon ug mga plano, makabutang lang sa mga sakop sa media sa kakuyaw. Kini maoy angay’ng bantayan sa mga tagdumala sa lainlaing newsrooms aron nga malikay sa peligro ang ilang mga sakop atol sa mga hostile environment news coverages.

Alang sa mga sakop sa media dinhi sa Sugbo, saulogon nato karong semanaha ang Press Freedom Week. Unta, mahaw-as na usab ang ubang mga sakop sa media sa ilang problema kabahin sa kagagmay’g sweldo sa tagsa-tagsa nila ka news outlets.