Lami apan makamatay
Husto si Senador Cynthia Villar. Dili tungod kay siya ang labing adunahang sakop sa Senado, ug dili tungod sa pagtuo nga mga kabus maoy maigo sa iyang awhag nga idili na ang unli-rice, kondili, tungod kay tinuod ang iyang pangangkon nga makadaot ang white rice ug makaayo ang brown rice.
Husto sab si Villar nga dili niya mapugos pinaagi sa pagpasaka og balaudnon ang mga kan-anan, ni ang mga kustomer, sa paghunong sa pinatuyangan nga pagkonsumo sa white rice.
Isip negosyante, siya ang labing nahibawo nga dili magawongan ang gawasnong patigayon. Klaro hinoon nga nikakak sab si Villar sa kadaghan sa mga botante nga nisukwahi niya.
* * *
Ang brown rice, nga mao ang white rice sa wa pa balikbalika og galing ug nahukasan sa nahibiling tipaka sa tipasi, mas daghang fiber ug nutrients. Mas ubos sab ang glycemic index kay sa white rice, ug busa dili makapasaka sa ang-ang sa asukar sa dugo.
Nakaplagan sab sa pagtuon sa Harvard University nga ang mas subsob nga pagkaon og brown rice makapatidlom bale og 10% sa kahigayonan sa diabetes. Samang pagtuon nga namantala sa The Archives of Internal Medicine nagbutyag nga ang pagkaon og white rice makadugang bale og 20% sa kahigayonan sa diabetes.
* * *
Unsa may alas sa brown rice? Gitumbok sa mga eksperto sa pagkaon nga ang nahibilin nga mga tipaka sa tipasi nisangpot sa kaabunda sa magnesium ug ubang mahinungdanong nutrients nga labing epektibo nga makasagang sa diabetes.
Kining maong benepisyo mapapas sa white rice. Bugti sa iyang kahamis ug kalami, kay lunlon na nga puti ug wa na’y bisan gamay na lang lama sa tipasi, ang well-milled o fancy rice nipahamtang sa bangis nga tunglo sa diabetes pinaagi sa pag-usbaw sa kahigayonan bale og 11% matag plato.
* * *
Nakugang ko nga may mga opisyal sa gobiyerno nihulagway sa unli-rice nga makapalingkawas sa mga kabus gikan sa kagutom ug makapalahutay nila sa bug-at nga mga gimbuhaton.
Kinsang mga tiil ang wa magtugkad sa yuta? Kang Villar o sa mga nanaway niya? Ang binilyon ni Villar mahimong nakatabang niya pag-diskubre sa mga benepisyo sa mahalong brown rice.
Ang ka-ignorante sa mga nanaway niya maoy nakapakatap sa kapugngan unta nga mga sakit.
* * *
- Latest
