Elevated tollroad vs. BRT
Sa kaulohan, ang nagka-team up nga Ayala Corp. ug ang SM Investment Corp. misugyot pagtukod sa ilang gitawag nga elevated tollroad (sa ato pa, dili kini skywalk lang, kun dili, dalan ibabaw sa kapatagan ug mga infrastructure), nga may gilay-on 8.6 kilometer gikan sa Sta. Mesa paingon sa Mall of Asia sa Pasay City.
Ang presidente sa AC Infrastructure Holdings Corp., ang Sugbuanong Jose Rene Almendras mibutyag nga ang maong unsolicited proposal mokabat og P25 bilyones. Gawas sa Ayala ug SM, nagpaabot sila si Almendras nga dugang mga dagkong korporasyon ang motampo ning maong ambisyuso kaayo nga proyekto.
Ang maong elevated expressway motadlas, gikan sa Sta. Mesa, sa Pasig River, Circuit Makati area, subay sa South Avenue ug Sen. Gil J. Puyat Ave., dayon ngadto sa Mall of Asia complex, dili moagi sa EDSA.
Gipaabot nga maka-decongest kini sa trapiko sa Metro Manila. Dili ba kaha ni mahimo dinhi sa Sugbo, inay ang BRT nga lisud ipatuman? After all, dili mogasto ang gobiyerno.
Matud ni Almendras matapos ang proyekto sulod sa tulo ka tuig. Maka-accommodate kini og 100,000 ka behikulo matag adlaw. Ilang gi-approach ang San Miguel Corporation, ug ubang korporasyon nga mosalmot sa ilang consortium.
Nindot ni nga development nga mahimong ma-apply dinhi sa atong dakbayan. Mao kini ang gisugyot sa pipila ka enhenyero nga ang bugtong solusyon pagsulbad sa problema sa trapiko, it’s either up or underground. Lisud na ang pagpalapad sa atong kadalanan nga maoy mahitabo kun mag-BRT kita. So, it’s either sa ibabaw o ilawom sa yuta.
* * *
Ang kang Andrew Tan nga Emperador Inc., mao na karon ang labing dako nga kompaniya sa brandy sa tibuok kalibutan. Kini, tapus mapalit ni Tan ang dakong kompaniya sa vino sa Espanya, ang Bodegas Las Copas sa kantidad nga 80.9 million Euros.
Ang napalit nga mga assets naglakip sa mga brand nga Presidente, Don Pedro, ug Azteca de Oro, lakip ang winery sa Baja, California.
Si Tan, usa sa napulo’g upat ka Pilipinhon nga natala nga labing adunahang negosyante sa tibuok kalibutan. Abante Pinoy!
* * *
Semana Santa na sunod semana. Ning panahon sa pagkinihaay ug pagdinumtanay diin maoy mihari karon ang kayugot ug kasina, let’s do some reflections, sa ingon kalamdagan kita sa tanan natong pagabuhaton.
Inay nga atong ukit-ukiton ug kulitugon ang kasaypanan sa uban, atong hinuktokan ug hinulsolan ang kaugalingon natong kasal-anan, sa ingon mahiusa kita kaylagi magsuon kitang tanan.
- Latest
