Alaut ang mga pobre
Dili tinuod ang pangangkon ni Presidente Rodrigo Duterte nga mga pobre ra ang namaligya og shabu mao nga mga pobre ang kasagaran nga nangamatay sa iyang gilusad nga gubat batok sa drugas.
Si Duterte mismo nihingan og mga adunahan nga iyang gilambigit sa drugas, apan kasagaran nila buhi ug wa’y kaso.
Gitataw ni Duterte nga ang mga nangamatay wa patya tungod sa ilang kakabus, kun dili tungod sa ilang pagsukol sa mga polis. Apan wa niya ipasabot ngano nga wa’y gihimo ang mga polis ug ubang ahensiya sa iyang pamunoan batok sa gitumbok niyang adunahan nga mga durugista.
* * *
Diha nga giatubang ni Duterte ang Sugbuanong negosyante nga iyang gipasanginlang drug lord nga si Peter Lim didto sa buhatan sa Philippine Drug Enforcement Agency (PDEA) sa Davao City niadtong Hulyo 16, 2016, gisubli ni Duterte ang pasidaan nga patyon niya si Lim kun mapamatud-an nga nagnegosyo og drugas sa wa’y paghisgot unsay sukaranan sa dugay na nga mga pasangil.
Dayong human sa tigom nga gisibya sa nasudnong telebisyon, nilubay hinoon si Duterte pinaagi sa pag-awhag ni Lim sa pagtabang sa National Bureau of Investigation (NBI) ug sa gobiyerno pag-absuwelto sa iyang kaugalingon.
* * *
Ngano nga gihikaw man ni Duterte ang samang pribilehiyo sa pagpakigtagbo niya, aron makapanalipod sab unta sa ilang kaugalingon, gikan sa dili mga pobre nga iyang gipasanginlan sama nilang Daanbantayan Mayor Vic Loot ug kanhi Cebu City mayor Mike Rama?
Sama sa iyang pagtunglo sa pobre nga mga adik, gitahan na ba daan ni Duterte nga sukwahi sa pasalig nga wa siya’y gikahadlokan, may mas dagko pa nga adunahan nga ilado sa nasud nga dili niya matandog?
* * *
Mao ba ni hinungdan nga may kongresista nga naapil sa iyang matrix sa negosyo sa drugas sa New Bilibid Prison (NBP) nga iyang gipangayoan og pasaylo, apan gipabilin sa depektusong matrix si Senador Leila de Lima?
Mao ba ni hinungdan nga gipabilin niya sa gabinete si Justice Secretary Vitaliano Aguirre bisan og nabisto nga nagbuot-buot kini sa pasangil nga gisuburnohan ang mga piniriso sa NBP pagbakwi sa ilang testimoniya batok ni De Lima?
Giisip ba diay ni Duterte nga mas grabe kining krimen kay sa pagpamakak ug pagmaniobra og mga ebidensiya, ang pagpanaway niya?
* * *
- Latest
