Walay pili-pili

Nakasabot gyud kaayo ko kun ngano nga suko kaayo si Mayor Tomas Osmeña ngadto sa mga kompaniya, sama sa Banco de Oro, nga wala mobayad og tukmang buhis ngadto sa dakbayan sa Sugbo.

Tungod kay kun tinuod man nga ang maong mga bangko ug daghan pa nga mga balay-patigayon wala magbayad sa tukmang buhis sa dakbayan, tabla ra og ilang gisabotahe ang siyudad aron mapugngan ang iyang paglambo.

Kaniadtong miaging gabii, didto ko sa usa ka bar nga nahimutang sa “rooftop” sa taas nga hotel dinhi sa dakbayan. Gikan sa akong nahimutangan, tataw kaayo nako nga naaninaw ang daghang tag-as nga building sa siyudad.

Nakaingon ko nga kun ang mga tagdumala sa maong building ug sa mga negosyo nga anaa niini nagbayad lang sa tukmang buhis, puwerteng dakoa sa kantidad nga makolekta sa City Hall ug magamit alang sa mga proyekto nga kapahimuslan sa katawhan.

Paglingkod gud ni Osmeña pagka mayor kaniadtong Hunyo 30, gitan-aw niya ngano nga gamay ra man kaayo ang koleksyon sa dakbayan. Nahukman niya nga unahon sa pagsusi ang mga bangko kun nagbayad ba sa tukmang buhis. Tuod, nakakita siya’g timailhan nga ang BDO wala mobayad sa tukmang buhis.

Apan kinahanglan unta nga si Osmeña mopaspas usab sa iyang paghimo og imbestigasyon sa ubang bangko kay kun ang BDO ra gud maoy iyang gukdon, ug wala ang uban, dili gyud malikayan nga magduda ang katawhan nga gigukod ni niya kay gipanag-iya man kini ni Henry Sy, ang tag-iya sa SM nga iya usab nga gigukod.

Tambag usab nako sa tagdumala sa BDO mao nga idiga ninyo kun pila ang tinuod ninyong kita. Kun kuwang man ang inyong gibayad ngadto sa City Hall, pun-i ug bayad, ug kun pamultahon kamo, bayari.

Kun magpabilin gyud hinoon nga dili mobayad og tukmang buhis ang BDO, kun tinuod man nga sila nanikas sa pagbayad sa ilang buhis, aw angay gyud tingali nga sirad-an ang ilang mga bangko.

Kay sigurado man ko nga daghan pa ang nanikas sa pagbayad sa buhis ngadto sa dakbayan, angay’ng paspasan pa ni Osmeña ang iyang kampanya batok sa ubang tax evaders. Daghan ang wala magbayad og  buhis.

Kinahanglan nga mopahigayon ang City Hall og tax mapping aron mahibaw-an kinsa kadtong wala magbayad og buhis, ug kini sila angay’ng himoan og estrikto nga lakang.

Unya, kinahanglang hashasan pag-ayo sa mayor ang iyang mga kawani nga tan-aw nako, daghan ang nagkangkang lang ang kamot nga modawat og sweldo, apan walay mga trabaho. Usa niini mao ang PROBE nga wala makahawan sa atong mga aseras ug daplin sa karsada nga giukopar sa mga mapahimuslanon.