Higot sa sabotahe
Si bisan kinsang nangahas pagsaway sa diktadura ni Ferdinand Marcos sa dakong bahin sa dekada 70 ug katunga sa dekada 80 gipasanginlan nga subersibo ug komunista. Ang mga nangawagtang mahimong gipriso nga way mga kaso pinaagi sa Arrest, Search and Seizure Order (ASSO) o gipangluba ug gipanglubong.
Si Presidente Rodrigo Duterte nga nag-idolo ni Marcos nitawag ni bisan kinsang nanaway niya nga mga durugista. Mas daghan nang nangamatay sa iyang tunga pa lang sa tuig nga gubat sa drugas kay sa dul-an sa duha ka dekada nga diktadura ni Marcos.
* * *
Si Senador Leila de Lima iyang gipasanginlan nga maoy nakahingpit sa narco-politics sa Pilipinas kay gitumbok nga maoy labing taas nga opisyal sa gobiyerno nga ginastohan sa drug lords. Ang Maute group sa Mindanao gitumbok niyang mga durugista. Bisan ang pagpamomba sa Hilongos, Leyte gihulagway nga panimawos sa mga durugista sa agresibong kampanya sa kapolisan.
Bisan ang mga nanaway niya nga di mahimong ilambigit sa drugas iyang gipasidan-an nga mahimong pasanginlang mga durugista ug, ginamit ang iyang kasinatian isip piskal sa Davao, mahimong ipadakop daan samtang maghunahuna pa siya unsay mga kaso nga ipasaka batok nila.
* * *
Sa wa pa makabanos sa Malakanyang, nipasangil nang daan si Duterte nga nag-amut-amot ang drug lords sa New Bilibid Prison (NBP) aron pagpatay niya. Wa siya magtagad pagpakita og ebidensiya, hinunoa gipanghatagan hinuon sila og immunity sa House of Representatives aron motabang og duot ni de Lima.
Mao pa lang gani pag-asumir sa palasyo, nitulisok na siyang daan sa Central Intelligence Agency (CIA), nga nagplano pagpatay niya. Nipasangil nga ang tanang panaway sa nagkalainlaing kanasuran batok niya dinasig sa mga Amerikanhon nga nisuway apan napakyas paggawong niya.
* * *
Karong bag-o, ang mga eskandalo sa iyang mga tinudlo gihulagway nga kabahin sa lapad nga sabotahe pagpalagpot niya sa katungdanan. Bisan way ebidensiya, gisublisubli pagtumbok ang hapit na mapapas nga Liberal Party (LP) nga maoy nangu sa kampanya pagpukan sa iyang pamunoan.
Lisod tuohan nga kabahin sa sabotahe ang pagdagit ug pagpatay sa Korean nationals ug pagpanuburno sa kadagkoan sa Buro sa Imigrasyon, apan saligi si Duterte nga makasumpay nila sa LP ug CIA. Ug sa drugas.
* * *
- Latest
