Giusikan nga kahigayonan

Naalarma ang simbahan ug ang mga gustong motamod sa tawhanong katungod tungod sa pagpakahilom sa katawhan nga Pilipinhon sa sunod-sunod nga pagpatay niadtong mga nalambigit sa ginadiling drugas.

Naalarma usab ang uban ug nanaway sa mga nagpasiugda sa mga pagpatay tungod kay nganong hasta ang mga mogamit lamang sa gidiling drugas giapil man sa pagpatay.

Gusto sa mga nanaway sa sunod-sunod nga patay nga hatagan pa og laing kahigayonan nga magbag-o sa ilang kinabuhi ang mga gipangpatay.

Ang mga nanaway mura’g didto magpuyo sa laing planeta kay wala masayod nga ang mga gipangpatay mao kadtong mga mitahan sa ilang kaugalingon human sila tuktoka ug hangyoa sa mga polis nga mobiya na sa pagpamaligya og shabu ug sa paggamit niini apan mibalik gihapon sa ilang naandan nga gawi.

Gihatagan na sila og higayon nga mag-usab o magbag-o sa ilang kinabuhi apan nagdumili sila sa paghimo niini. Gihatagan na sila og kahigayonan apan ila kining giusikan.

Ang mga mogamit sa ginadiling drugas angayan gayod nga hipuson tungod kay sila ang responsable sa 70 porsiyento nga krimen sa nasud. Sila ang nangawat, nanulis, nanglugos ug mipatay og kinabuhi.

Mas peligro pa sila kay sa mga namaligya og ginadiling drugas. Sa mga nagtoo nga ang mga migamit og drugas biktima, sakto mo.

Apan ingnon ko kamo nga sila mga boluntaryong biktima nga dili angayang kaluy-an kay peligro sila sa katilingban.