Kamatinud-anon ni Rama

Way bilib si suspended Cebu City Mayor Mike Rama ni Davao City Mayor Rodrigo Duterte. Kay giisip niya nga di sinsero si Duterte sa pagdagan sa labing taas nga katungdanan sa nasud. Gitumbok ni Rama nga ang panagana ug paglangay-langay ni Duterte pagdeklarar sa iyang kandidatura nagmatuod nga di siya andam nga mobanos sa Malakanyang.

Mas bilib si Rama sa iyang padrino sa politika nga si Bise Presidente Jejomar Binay. Kinsa iyang gihulagway nga wa magtagu-tago sa iyang politikanhon nga ambisyon. Kay sa unang adlaw pa lang sa pag-asumir sa ikaduhang labing taas nga katungdanan , gipahibawo dayon ang iyang kandidatura sa pagka presidente.

* * *

Mao nga bisan nisulbong na pag-ayo ang popularidad ni Duterte dinhi sa Sugbo, nga ang ubang mga lider sa politika way kukauwaw nga nibalitok ngadto niya, samtang ang uban nagpaka aron ingnon gihapon nga matinud-anon sa una nilang gisuportahan apan sa hilom nabaiid na sa bandwagon ni Duterte, wa mobalhin og partido si Rama.

Nagpabilin siyang matinud-anon ni Binay. Bisan gipasidan-an sa labing suod niyang mga higala nga mahimong mabira siya paubos sa daghan uyamot nga mga pasangil sa pagpangawkaw batok ni Binay ug bisan sa mga huhungihong nga wa mahatagi sa gisaad nga pundo sa kampanya, gitataw ni Rama nga di niya taras ang pagka balimbing.

* * *

Napakyas si Rama pagpadaog ni Binay sa Dakbayan sa Sugbo: Si Duterte ang nakakuha sa makabungog nga mayoriya; si kanhi Interior Secretary Mar Roxas ang ikaduha; si Senador Grace Poe ang ikatulo; ug bisan sa pasalig ni Rama ikaupat   ra  kutob si Binay.

Apan si Rama ra ang makapangangkon nga wa magbalibali sa iyang baruganan sa politika. Lahi sa ubang mga politiko nga Roxas ug Poe sa atubangan apan sa tago ug dayong Mayo 9 nipapatik ug nipakatap og kaliboan ka sample ballots nga nikumpayot na sa naglawig nga kampanya ni Duterte.

*  * *

Maong nahibung ko ngano nga human napasaka sa Commission on Elections (COMELEC) ang iyang protesta batok sa kadaogan ni Mayor-elect Tommy Osmeña, giawhag ni Rama si Duterte pagtabang niya. Gigamit pang Rama nga usa sa sukaranan sa pagpakitabang sa umaabot nga presidente ang managsama nilang eskuylahan sa abogasiya.

Tungason ang tinguha ni Rama kay mas suod si Duterte ni Osmeña kay niya. Katunga sa Bando Osmeña Pundok Kauswagan (BOPK) nangampanya alang sa Duterte-Osmeña (Let’s DO It). Gawas pa, di ang bag-ong presidente, bisan sama pa kahawod ni Duterte, kun dili ang COMELEC ug dayon ang mga korte maoy naghupot sa gahom paghusay sa iyang mga ebidensiya, kun duna man, sa giingong lapad nga pagpanikas nga nakapilde niya di lang sa kabarangayan nga iya ang mga kapitan kun dili apil na sa kaugalingon niyang presinto.

[email protected]