EDITORYAL - Brand new PNP vehicles

Nindot kaayo og dungog si Mayor Michael Rama kay gipahatagan niya’g mga mahalon kaayong sakyanan ang lainlaing police station ug mga special police units aron molambo ang ilang serbisyo.

Sukad-masukad, karon pa nakaangkon ang 29 ka police stations ug special police units og mga brand new nga Toyota Fortuner, mga Mitsubishi Adventure ug Toyota Vios nga kotse.

Sukwahi sa kanunay’ng pangangkon sa kampo sa mayor nga gibabagan sa City Council ang iyang mga proyekto, kining dinungan nga pagpamalit og sakyanan sa dakbayan maoy nagmatuod nga dili tinuod ang iyang pangangkon.

Dili makapagawas og kuwarta si Mayor Rama alang sa iyang mga proyekto kun dili kini uyonan sa mga sakop sa konseho. Apan milutaw lang hinuon nga ang mayor maoy nahimong bida niining paghatag og mga mahalong sakyanan.

Gipatawag sa mayor og tigum ang mga hepe sa kapolisan usa ka gabii niana ug didto niya gipahibawo nga nakapalit na ang City Hall og mga bag-ong sakyanan nga ihatag kanila.

Gipanghatag ni Mayor Rama ang mga sakyanan kagahapon dungan sa pag-awhag sa kapolisan nga maningkamot sila aron mapalambo ang kahusay ug kalinaw sa kinatibuk-ang dakbayan.

Ang mga polis giawhag sa mayor nga motrabaho gyud aron pagsiguro sa hapsay ug malinawon ang eleksyon karong Lunes, labaw sa tanan nga wala sila’y dapigan.

Ang paghatag og mahalong sakyanan ngadto sa kapolisan mas bentaha na lang hinuon kay sa adto kini ihatag sa mga opisyal sa kabarangayan aron lang mosamot sila pagsipsip sa mayor.

Wala malilong sa kadaghanan nga ang paghatag og brand new nga mga sakyanan ngadto sa mga kapitan ug pinili nga konsehal maoy usa sa mga rason nga ang mga hingtungdang opisyal mipilit pag-ayo sa mayor aron dili sila mabawian sa sakyanan nga gipagamit kanila.