Nawani ang dengue sa zika

Naukay ang kalibutan sa pagkatap sa zika virus nga giisip na karon sa World Health Organization (WHO) nga public health emergency international concern.

Kini tungod sa paspas nga pagkuyanap sa balatian nga makuha gikan sa lamok nga aedes aegypi nga mao usab ang nagdala sa kagaw sa dengue ug chikungunya.

Lakip sa nakatutok niini mao ang Pilipinas aron maseguro nga mapugngan ang posibleng pagkuyanap sa zika virus sa nasud.

Kun atong sabton, ang zika virus delikado lang sa babaye nga magmabdos sanglit mahimo man nga maapektohan ang development sa utok sa bata nga anaa pa sa sabakan sa inahan.

Tungod niini posible nga mogawas ang bata nga gamay og ulo.

Mahimo usab kini nga makatakod pinaagi sa pakighilawas, ug labaw sa tanan, dili deadly ang zika virus itandi sa dengue.

Kun ato nga hunahunaon, mas makalilisang gihapon ang dengue virus sanglit kinabuhi ang segurado nga kutloon kun dili madali sa pagtabang ang tawo nga mataptan sa kagaw.

Dili man dautan nga mohimo og hugot nga pagpangandam batok sa pagsulod sa zika virus apan mura’g "OA" (overacting) ra tungod kay may dengue virus nga dugay na nga nagsabwag ug kadaot sa katawhan dinhi sa nasud apan ang gitutokan karon mao ang zika.

Hinoon pareho ra nga matang sa lamok ang nagdala sa mga kagaw busa ipadayon nato ang pagpuhag sa mga aedes aegypti aron segurado nga luwas ang atong kinabuhi.