Mr. Barangay
Brgy Pajo, Daan Bantayan, Cebu
"Naunsa na man ning among barangay kapitan nga ang mga miyembro sa 4P's mao may palimpyuhon daplin sa karsada unya kun dili makaapil pagpangguna ibanan man og P500 ang ilang madawat.”
Brgy Labogon, Mandaue City
“Amo lang unta ipaabot ang among kasagmuyo aning kabahin sa GAMA nga nagpadagan og tubig diri kay dili man magpahibawo kun dili na nila paagason nga ila man unta ning trabaho.”
Brgy Tayud, Consolacion, Cebu
“Ako lang unta ireklamo ang mga opisyal namo diri kay wala man gyud mi kabantay nga may gibuhat sila para sa among barangay. Wa sila’y aksyon nga gihimo sa problema namo sa kanal ingon man sa ilegal nga drugas.”
Brgy Babag2, Lapu-Lapu City
“Luoy kaayo mi diri nga mga nagpuyo sa may Sitio Radar kay bati kaayo ang among karsada, wala gyud atimana sa among mga opisyal nga unta dugay na man ning problemaha.”
Brgy Looc, Santander, Cebu
“Pasalamatan namo ang among mga opisyal sa lungsod kay gisugdan na og survey ang karsada namo nga gubaon na kaayo gikan sa Rabadon padu’ng sa Bunlan. Basin kun masemento na tingali ni karong tuiga.”
Brgy Maslog, Danao City
“H apit kada buwan man mangayo’g bayad nga tag P65 ngadto sa mga bata ang mga maestra sa high school diri. Mao ba diay ni patakaran sa mga public school? Ingon wa’y bayad pero dagko man hinoon og bayranan ang mga bata unya kami ang ginikanan ang mahasol kay pobre baya mi.”
Brgy Pusok, Lapu-Lapu City
“May reklamo mi diri sa Sitio Matumbo kay puwerteng ngitngita sa among lugar panahon sa gabii kay wala gyud butangi og suga. Lahi ra kaayo sa Brgy Pajo kay inatiman kaayo maong nindot tan-awon ang ilang karsada panahon sa Pasko.”
Brgy Dakit, Bogo City
“Badlongon unta sa mayor ang mga opisyal sa barangay kay mura man og kadudahan ang ilang mga lihok bahin sa pundo sa barangay kay wala man sila makahimo’g proyekto diri. Asa na man diay ang budget para sa barangay nga wala man mi kakita og project nila.”
Brgy Ocoy, Sta Fe, Cebu
“Hangtod karon daghan pa kanamo nga biktima sa bagyo ang wala pa gyud makadawat og emergency shelter assistance gikan sa gobiyerno. Ingon sila may second batch pero hangtod karun wala pa man gyud.”
Brgy Cantumog, Carmen, Cebu
“Atimanon na unta ang among karsada diri kay puwerte na man gyud nga gubaa, wala man gyud ipatrabaho nga klaro na man kaayong dagko’g libaong.”
Alang sa inyong mga reklamo text lang sa 09083006702
- Latest
