EDITORYAL - Estratehiya sa China

Peligro sa Pilipinas ug sa Vietnam kining giplano sa China nga pagpahigayon og joint-naval drill sa ASEAN members diha sa West Philippine Sea.

Ning bag-ohay lang, ang defense minister sa China miimbitar sa mga defense ministers sa ASEAN aron kuno hisgutan ang mga mekanismo aron malikayan ang aksidenteng giyera diha sa WPS.

Usa sa gisugyot sa China ang joint naval drills sa ilang pwersa ug sa tanang mga sakop sa ASEAN ilabi na kadtong adunay claims sa WPS sama sa Pilipinas, Vietnam, Malaysia ug Brunei.

Kinsa man ang China para maoy mopatawag og susamang join naval drills nga dili man sila maoy tag-iya sa mga teritoryo sa WPS?

Ang China pugsanong miangkon sa WPS bisan sa pagsupak sa mga silingan niining nasud sa ASEAN sama sa Pilipinas ug Vietnam.

Ang gibuhat sa China binuhatan lamang sa usa ka armadong tulisan nga nisulod sa usa ka panimalay. Gamit ang pagpanghulga ug armas diktaran niini ang tagbalay sa kung unsay iyang gusto.

Kinahanglang dili mosugot niini ang ASEAN ilabi na ang Pilipinas. Kini tungod kay tataw kaayong political strategy kini aron buakon ang panaghiusa sa ASEAN. Taktika usab kini aron sa ingon mahimong 'legal' ang pagbahis-bahis sa ilang mga barko ug abyon diha sa WPS.

Nameligro ang Pilipinas ug ang Vietnam kun mokubit ang ubang ASEAN members sa paon  tungod kay sila na lang duha unya ang mobabag sa ambisyon sa China diha sa WPS.

Gituyo usab kini aron kun madala sa China ang mayoriya sa ASEAN, mataha na ang Amerika manginlabot sa WPS , ug ning paagiha, sayon na lang pagpitlok ang oposisyon sa Pilipinas ug Vietnam.

Mahinayon man kini o dili (di angay moapil ang Pilipinas niini), kinahanglang dili iabandonar sa Pilipinas ang katungod niini sa WPS.