Lig-on og mga karibal

Dear Tito Miguel,

Ako diay si Paulo, taga San Fernando, Cebu .

Naa ko’y gusto nga babaye  nga ginganlan og  Fatima. Dugay na nako siyang nagustohan, ug gusto unta nako nga mas mailhan pa siya ug sugdan og paninguha nga makuha ang iyang atensyon.

Nagkaila mi tungod kay gipaila -Ila mi sa among common friends .

Pero naa koy usa ka problema, Tito  Miguel . Daghan kaayo ang nanguyab niya , ug ang uban nila kay mga big time. Naay kwarta, nindot og trabaho, ug Dili basta -basta .  Naa man sad ko’y work , pero sakto-sakto  ra gyud ang akong suweldo .  Usahay, makapangutana ko sa akong kaugalingon kung naa ba koy ikabuga kung ikumpara nako akong kaugalingon ubang lalaki nga nanguyab kang Fatima .

Nahadlok ko nga basin wala koy chance nga mapansin niya tungod kay mas daghan og ikatanyag ang iyang ubang suitors . Tita Miguel , unsa may akong angay buhaton? Mopadayon ba ko sa akong tingoha  o dawaton na lang nako ang kamatouran nga wala ko’y tsansa sa kasingkasing ni Fatima ? — Paulo

* * *

Paulo,

Wala ka mag hisgot nga naa na siya’y uyab. Ka’y kun wala pa, buot pasabot wala pa siya’y napili-an o nauyonan sa mga nanguyab niya maski big time pa sila. Tinuod, mahawngan ka kun imong  mga karibal labaw pa kanimo. Pero dili man ikaw ang mopili, ang inyo man gipanguyaban. Busa ayaw siya unhi, wala ka kahibawo ikaw ra diay iyang gipaabot nga mobuhat sa first move. Siya ra ang bugtong makatubag sa pangutana kun kinsa ug unsa iyang  gipangita. Suwayi lang, total  kamo tanan nga nanguyab kaniya namasin ra man, wala’y ma’y sigurado o garantisado.

Pero aron makuha nimo iyang atensyon, kani ang buhata, ingna siya nga ganahan unta ka manguyab niya pero mahadlok ka mabalibaran ka’y nakita nimo daghan pa siya’g kapilian nga labaw pa nimo. Kun moingon  kinsa’y ingon mobalibad siya, buot pasabot duna ka’y pag-asa. Samot na’g miingon ayaw palabi’g paubos sa imong kaugalingon, buot pasabot taas ug bililhon iyang panan-aw nimo.

Kun dili motubag, lagmit sakto imong gikahadlokan. Pero duna pu’y  purohan igo ra ka gisuwayan. Timan-i, tugkaronon kasagaran babaye, dili gyud nimo masabtan kun dili nimo suwayan. Usahay igo ra ka gihagit sa ilang pagbalibad. Dili ka tagdon, mora’g wala ka makit-i, apan diay to nagpaabot nga ikaw ang mouna. Ang tanan nimo’ng pangutana dili matubag kun dili ka mopadayag. Kumpisal na. Wala’y mawala nimo kun imo suwayan, pero’g wala ka’y buhaton, mawala kanimo ang higayon. Tito Miguel

Magpatambag ka? Ipada kang Tito Miguel:  0991-318-9366