Ang isda
Sugilanon - Apronianito F. Miramon (Banat) - January 4, 2016 - 9:00am

Taud-taud na nga nagpa-utaw-utaw sa lawod ang baruto ni Mario. Nagpaabot siya nga adunay isda nga motukbil sa gitaan niya nga talunton. Gilantaw niya ang halayong sidlakan. Ang kaganinang nagbukot nga kangitngit inanay na nga miiway. Ang adlaw nga giugom pa sa sidlakan hinay-hinay na nga misabwag sa limbahon niining mga bidlisiw.

Daw sa wa lang niya mabantayi ang pagpanglabay sa mga takna. Sama sa naglumpayat na sab ang iyang dughan nga naghuna-huna nga naangkon na gyod niya ang gugma ni Luisa. Ang babayeng natingban sa iyang pagmahal diin iyang gihalaran sulod sa usa ka tuig.

Kalit siyang nahipugwat dihang gibitad ang iyang talunton, tima-an nga aduna na'y isda nga mikubit. Gisukli-an usab kini niya'g bitad aron gyud mopatlak ang taga ug sigurado kini nga makuha. Gi-ariyahan niya ang tangsi sa kahadlok nga maputol, dihang misuki kini.

Dihang nabana-bana niyang naluya ug nasakitan na ang isda, kay mipa-undayon na man kini, gipaspasan niya'g bira ang bahayan. Naghinam-hinam siya kay base sa iyang kasinatian isip mananagat, aduna gyod kini sarang gidak-on.

Wa gyud siya masipyat sa iyang huna-huna. Hapit manglugwa, ang iyang kalimutaw dihang duol na kini. Mamsa! Misinggit sa kalipay ang iyang dughan. Kadako sa mamsa! Ako ka na gyud!

Mikisi-kisi ug milugnot ang isda dihang hakpon na unta ni Mario. Ug nahitabo ang wala niya damha. Nakatang-tang kini sa taga!

Nakapanglitik siya sa iyang tudlo diha sa hangin tungod sa kahinugon. Nangagho ug unya nangawot sa iyang tangkugo.  Hoyhoy ang iyang abaga, ug dungan niini nahinumdom siyang Luisa. Nawad-an na hinuon siya'g gana mopadayon pa sa pagpanalunton.

Paspas siyang namugsay nga daw nakiglumba sa mga balod. Pipila ka gutlo pa  ug diha na siya sa  piliw. Gidahik niya ang baruto ug didto sa unahan nakita niya si Noreen iyang manghud nga nagdagan paingon kaniya. Mibutok-butok sa kabalaka ang iyang dughan.

"Manoy! nakahibalo ka ba sa nahitabo?" Naghangos kini tungod sa kakutas.

Mikunot iyang agtang. "Si Luisa ba... "O ngano si Luisa?" misamot ang kuba sa iyang dughan. Gusto niya nga magpakisayod. "Gitaban ni Nanding!" - Kataposan

ANG DIHANG GIDAHIK IYANG KINI LUISA MARIO NGA NIYA QUOT SI LUISA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with