Alibangbang
Sugilanon - Jethro Barita Ochea (Banat) - October 12, 2015 - 10:00am

Ning buntaga, nalingaw si Noy Meloy nga nagtan-aw sa teknikulor nga alibangbang. Nagtapontapon kini og tugdon sa nagkalainlaing punoan sa mesitas nga nagsapnay sa ilang mga bulak.

Naglingkod si Noy Meloy sa kawayang lantay, simpig sa bentana sa iyang gipuy-ang payag dinhi sa banika. Ang mga alibangbang kiat kaayo sa iyang pagsiba sa nagkalainlaing mga bulak sa tanaman.

Mosiba kini sa mga lapyo nga bulak sa rosas, dayon mobalhin kini pagsiba sa mga bulak sa antuwanga, bombil, kalachuche ug santan.

Gitupsan niini pagsiba ang nagkalainlaing mga bulak nga gisapnay sa nagkalainlaing punoan sa tanaman. Nakapanglingo si Noy Meloy. Nagkitabkitab ang iyang baba.

“Pastilan! Diha sa maong alibangbang, nakita ko karon ang pamayhon sa mga politiko nga manglansar aron sa pagpapili ning umaabot nga eleksyon.

Mga marukoy nga mga mokandidato, mga opurtunista sila. Mangita sila og ilang kapasilongang partido, unya, kun dili kuntento, magbalhinbalhin sila og partido nga ilang kapasilongan nga makahatag kanila og hustong badyet alang sa ilang pagpangampanya.!”

Sa edad karon nga 70 na, nakasinati na si Noy Meloy sa daghang lokal ug nasyonal nga eleksyon. Mokiat lang sa paglansar ang mga kandidato.

Adunay madala sa ilang kasikat kunohay, ilabi na nga nag-una kuno sa mga survey nga bisan wa pa’y kasinatian, nagpatuga g’yud og lansar sa usa ka hataas nga posisyon.

May milansar pud nga bisan nabaniog nga hilabihang kurakota, magpapili gayud sa umaabot nga eleksyon kay hakog sa gahom.

Duna sa’y daghang manglansar nga mag-agap lang sa kahig sa badyet ug magbalhinbalhin og partido, sama sa alibangbang nga nakita karon ni Noy Meloy nga mikiat lang sa pagbalhinbalhin og paniba sa lainlaing punoan sa kabulakan. Mga balimbing! Mga opurtunistang dako!

Nakapanglingo na usab si Noy Meloy. Mao kini ang angay nga bantayan sa matuod ug umaabot nga botante, nga dili gayud masipyat sa pagpili og usa ka kandidato sa umaabot nga eleksyon.

Kini ilabi na gayud sa mga kandidato nga nahisama sa usa ka alibangbang nga mga opurtunista ug balimbing nga wa’y klarong plata-porma-de gobiyerno. (Katapusan)

ACIRC ADUNAY ANG DIHA DUNA GITUPSAN KATAPUSAN MGA NAKAPANGLINGO NGA NOY MELOY
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with