Sige pa gihapon

Dear Tita Salie,

Good day to you, Tita. Tawga lang ko sa pangalan nga Aillene, 25, ug taga Guadalupe, Cebu City. Duna ko’y long time boyfriend. Sukad mi gabuwag, sige pa gihapon siya’g text ug tawag nako, pero dili nako siya tubagon. Ang akong pangutana, aduna pa kaha siya’y pagbati nako hangtud karon? Palihug pasabta ko, Tita Salie.

Good day Aillene,

Una nimo planohon nga sumpayon ang naputol ninyo’ng kagahapon, ang kaniadto kun ngano’ng nagkabulag mo mao unay angay nimo’ng pamalandongon.

Unsay imong gibati diha’ng nagkabulag kamo? Ang panagbulag tingali maoy usa ka kasinatian nga kinasakitan nga imong naagian.

Gani ang uban miingon nga sila mura’g mamatay. Buot ba nimo nga mausab ang makasakit mo’ng kasinatian? Ang panagbulag sama kini’g samad nga maalim ra apan bantayan nga dili maimpeksiyon kay lisud na kini’ng tangtangon.

Seguro ingon niini ang imong boyfriend, nainpeksiyon na siya sa gugma kanimo ug lisud ka na niya’ng tangtangon hinungdan nga matag panahon gusto siya og komunikasyon gikan nimo.

Ngano’ng dili man nimo tubagon aron imong masayran? Apan kini’ng tanan anaa ra g’yud kanimo. - Tita Salie