Ang buang
Sugilanon - Apronianito F. Miramon (Banat) - October 22, 2014 - 12:00am

Gikan akong misimba sa Cathedral niadtong hapona. Misimba ko nga nag-inusara kay Martes man gud ang akong day-off adtong buwana. Basta kining adlawa gani ang akong day-off di gyud mi magkakuyog og panimba sa akong pamilya kay Domingo man gud ang permanenteng day-off sa akong asawa ug tua sab sa eskwela ang akong anak.

Pag-abot sa highway sa gisakyan ko nga dyip nga dunay rota nga Bulacao-Colon nagtagsa-tagsa na og panganaog ang mga pasahero. Paghiabot sa Basak tulo na lang gyud mi kabuok human dihay nanaog. Pag-aginod sa sakyanan dihay misakay nga buang. Nagkagidlay ang pamiste niini ug nangalisbo ang kabaho. Nanampong kami sa among mga ilong.

Samtang nagdagan ang dyip, mihinay-hinay sab og sibog ang buang paduol kanako. Wa na ra ba koy kasibogan kay diha man ko maglingkod pidpid sa kanaugan (kini laging gusto ta nga makanaog dayon inig para). Mao nga giantos ko na lang ang kabaho ug gihugtan na lang nako pagpisil sa akong ilong.

Diha’y gikuot nga gamay’ng papel ang buang   diha sa bulsa sa iyang bag nga nagkato usab sa kabulingon. Nakalitan ko dihang iyang gidudho sa akong nawong ang maong papel. Natataw nako ang tulo ka numero apan wa ko hisabti ug mahibaw-i unsa kadtong numeroha. Apan ang buang wa gyud moangka dudho ngari kanako.

Unaha’g gamay sa USJ-R Basak Campus may nakita ko nga lotto outlet. Kalit may misantop sa akong hunahuna. Suwayan ko og patad kadtong numero sa buang. Pamasin lang tong ako kay di baya ginhapon  nga mopusta ko.

Pagkaugma, mipalit ko og bag-ong hulad nga  Banat News sa akong suki nga newsboy diha sa eskina sa Sto. Niño Community atbang sa kapilya sa Baspar. Samtang naglakaw ko nagkalingaw sab ko’g pakli sa mga panid. Unya wala tuyo-a nga napakli nako kadtong panid nga may resulta sa lotto. Nanagko ang akong mga mata pagkakita nako sa numerong 478, ang numero diha sa papel sa buang nga kasakay ko kagabii. Nakadaog ko kay gipatdan ko man kadto og balig 50 pesos.

Gisultihan ko sa nagbantay sa lotto outlet  nga adto kuno sa PCSO Regional Office kobrahon ang akong daog sanglit dako-dako man.

Sa dayon na nakong lakaw aron mokubra sa akong daog, mihapit sa ko’g mga pagkaon sa Goldilocks. Ihatag ko kini sa buang nga maoy tag-iya sa maong numero. Apan wa ko siya mapalgi bisan sa akong pagpauli gikan nga nagkobra. Gihatag ko nalang kadto sa mga bata nga manaygon sa dyip nga akong gisakyan.

Karon, kapin na sa tuig sukad niadto apan bisan anino sa maong buang wa ko na makit-i. “Hain na kaha tong maong buang?” pangutana ko sa kaugalingon. (Kataposan)

AKONG APAN BANAT NEWS BUANG PAG R BASAK CAMPUS REGIONAL OFFICE SAMTANG
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with