Secret Admirer

Nahingangha pag-ayo si Carolyn diha nga giingnan siya sa kahera sa restaurant nga gibayran na ang iyang gikaon karong udtoha. “Kinsa ang nagbayad?” gisukna ni Carolyn ang kahera ug gilingi niya ang mga tawo nga diha sa lainlaing lamesa.

“Si Atty. Razon maoy nag-apil og bayad sa imong order,” matud sa kahera. “Asa ana si Atty. Razon?” subli nga pangutana sa dalaga nga nahimo’ng bag-ong clerk sa Saavedra, Ruiz & Poblete Associates kang kansang bupete anaa sa usa ka building sa Osmeña Boulevard.

Tuod, nakabantay si Carolyn nga sa pikas nga bupete tupad ra sa gitrabahoan niya nga opisina sa mga abogado, dunay abogado nga magsige og tutok kaniya sa mata’g higayon nga siya moagi.

“Nakalakaw na si Atty. Razon miss. Paghuman nimo’g order naatol nga mibayad siya ug giapilan ka na lang niya,” matud sa kahera. Pagbalik ni Carolyn sa gitrabahoan niya’ng bupete, gilingi niya ang bupete nga may marka nga Saavedra, Ruiz & Poblete Associates. Apan wala diha ang lalaki nga kanunay’ng mutan-aw kang Carolyn. Nagpakisayod si Carolyn sa kauban niya sa opisina kun may nailhan ba sila nga Atty. Razon. Apan ang mga kauban ni Carolyn wala’y nailhan nga abogado nga Atty. Razon.

Gisaysayan ni Carolyn ang iyang mga kauban nga gilibre siya og paniudto ni Atty. Razon nga wala magpahibalo kaniya. “Naibog tingali to nimo day,” matud sa guwangon nga clerk sa gitrabahoan nga bupete sa dalaga.

Researcher si Carolyn sa bupete ni Atty. Mahait. Wala pa maka-take sa bar ang dalaga tungod sa kakuwang og budget alang sa pag-review mao nga mitrabaho usa siya isip researcher.

Pagkaugma sa udto, misulod na usab si Carolyn sa suki niya nga restaurant. Didto siya nagpahimutang sa daplin. Pagbayad niya sa kahera, giingnan na usab siya nga giapilan na siya pagbayad ni Atty. Razon. (Sumpayan)