^

Sumbagay ta

SUGILANONG PAMBATA - Fred Fuentes Monternel - Caduawan, Tabogon, Cebu (Banat) - September 12, 2013 - 12:00am

Sumbagay ta....!” isog kaayo nga miatubang si Bokbok kang Junjun niadtong hapona ug nahunong ang kabataan sa ilang dula nga dagandagan ug dakopdakop sa bakanteng luna sa ilang baryo.Mao kini ang dapit nga duwaanan sa kabataan matag adlaw’ng Sabado ug Domingo nga way klase ang publikong elementaryang eskuylahan sa baryo.

Kalma kaayo si Junjun nga igo lang mitutok kang Bokbok, kinsa misamot sa pagkahambugero dihang giabibahan siya sa katalirungang kabataan sa baryo.

“Nganong magsumbagay man ta, Bok? Migo god ta...!” nangatarungan si Junjun.

“A, lagot ko nimo! Sumbagay ta aron maila kun isog ba gyud ka!”

Misuliyaw ang mga kadula nila ni Junjun ug Bokbok nga nag-alirong na nila.

“Sige, Bokbok, Junjun! Sumbagay dayon mo...!”

“Hikapa ang dunggan, Bok...!”

“Tumbi ang tiil, Bok...!”

Misamot og gara si Bokbok nga misunod sa abiba sa katalirungang kabataan. Iya dayong gihikap ang dunggan ni Junjun ug gitumban ang tiil niini.

Mipataliwala dayon si Em-em, ang bugtong batang babaye nga apil sa dula ug suod kaayo ni Junjun.

“Ayaw mo’g sumbagay, Jun, Bok! Pag-amigohay lang mo...!”

“Ayaw’g labani ning amigo mo, Em, nga puti’g itlog...!” ni Bokbok nga kalit mitukmod ni Junjun nga wa gyud mopakita’g pagsukol.

Ug mihugyaw pagkatawa ang kabataan diha sa alirong nga padayong mitutok kang Junjun. Talawan nga pagkabata ang pagtan-aw sa kabataan sa baryo ngadto kang Junjun, kay dili man gyud ni mosukol kang Bokbok, sa daghang higayon nga hagdon kining sumbagay sa matag dula nila sa bakanteng luna.

Klasymet sila si Junjun ug Bokbok sa Grade Five Section One, uban ni Em-em. Apan nasuya lang gyud si Bokbok kang Junjun kay nag-una kini sa honor roll ug suod usab kaayo sila ni Em-em.

“Dili gyud unta ko mosukol nimo og sumbagay, Bok! Apan nahutdan na ko’g pailob! Ipakita sab nako kang Em-em ug sa tanang kabataan sa atong baryo nga dili ko talawan...” ug nanukad si Junjun  nga miatubang kang Bokbok.

“Yahooo! Sumbagay na ni! Mosukol na si Junjun kang Bokbok!” singgit sa kabataan.

Ug nahitabo gyud ang sinumbagay nila ni Junjun ug Bokbok. Ug miabiba ang kabataan sa nagsumbagay. Gikuyawan sab si Em-em. Namatud-an sa tanan nga maayo kaayong manumbag si Junjun kontra kang Bokbok nga igo lang sa paggakos ug paglayog. Hangtud nga natumba gayud si Bokbok nga naigo sa nagpungasing kumo ni Junjun. Nakadayeg ang katalirungang kabataan kang Junjun ug mipakpak silang tanan.

“Unsa, sukol ka pa, Bok? Tindog....!”

“S-surender na ko, Jun! D-di na ko mosukol!” mipataas sa iyang kamot si Bokbok nga naghapa gihapon sa bakante.

“Tana, Em! Mamauli na ta kay hapon na!” ni Junjun nga miguyod ni Em-em sa paglakaw. Nasayod si Junjun nga dili na gayud mag-inisog kaniya si Bokbok ug dili na gayud siya tawgon og talawan sa ilang baryo sa katalirungan niyang kabataan. (Kataposan)

APAN AYAW BOK BOKBOK JUNJUN KABATAAN KANG SUMBAGAY
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with