Upat ka suspek sa pagpangrakrak nadakpan

CEBU, Philippines — Nangadakpan na sa Liloan Municipal Police Station ang upat ka mga suspek sa pagpangrakrak sa grupo sa mga batan-on nga nagtambay ug giingong nag-inom sa usa ka convenience store sa Barangay Yati, Lungsod sa Liloan niadtong Huwebes sa kaadlawon.

Ang mga suspetsado giila nga sila si alyas Niño, 18 anyos, residente sa Barangay Looc; ang magsuong kaluha nga sila si alyas B1 ug B2, pulos 34 anyos ug residente sa Barangay Jagobiao, dakbayan sa Mandaue ug si alyas Mak-mak, 21 anyos, nagpuyo sa Barangay Calero, Lungsod sa Liloan.  Nagkanayon si Police Major Eric Gingoyon, hepe sa Liloan Police Station nadakpan sila sa hot pursuit operation niana dayong gabhiuna hangtud sa kaadlawon pagkasunod adlaw human sa krimen.

Pasado alas 11 sa gabii adlaw'ng Huwebes unang nadakpan si Beduya sa Barangay Looc, Danao City, ug kini dali nga mitug-an kung kinsa pa ang iyang mga kauban sa pagpangrakrak.

Tungod niini sunod nadakpan sa Barangay Jagobiao, Mandaue City sila si B1 ug B2 pagka alas-2 sa kaadlawon kagahapon dayon pasado alas -4 sa kaadlawon nadakpan sab si alyas Makmak.

 Personal grudge ug gang war ang motibo sa krimen. Giingong ang mga suspek miyembro sa Bloods ug nanimawos sa mga biktima nga Crips gang kay ang uyab sa namatay maoy nakadunggab sa kauban sa mga suspek atol sa rambol duol gihapon sa maong lugar sa nakalabay nga mga adlaw.

Niadtong Mayo 8, atol sa pista sa Mandaue nagkarambol na sab ang grupo apan nauwang sila sa kapulisan.

Namalhin sa Lungsod sa Liloan mga Crips apan gisundan sila ug didto na gipaarakan. Gawas sa upat nga nadakpan naaa pay usa ka suspek nga gipangita ang kapulisan kini mao si alyas Ugoy.

Si B1 nakuhaan og .9mm nga kalibre sa armas ug dunay unom ka mga bala nga gikatakdang ipaubos sa ballistics examination aron pagsuta kun motakdo kini sa 18 ka basiyo ug upat ka slugs nga na recover sa crime scene.

Kasong murder, frustrated murder, attempted murder ug illegal possession of firearms ang kasong ipasaka batok sa mga suspetsado. IBM BANAT NEWS