P525M balor sa ilegal nga drugas nasakmit sa PRO-7
CEBU, Philippines — Gikan sa buwan sa Enero hangtud sa kasamtangang buwan niining tuiga ang Police Regional Office(PRO)-7 nakakompiska og kapin P525 milyones nga balor sa ilegal nga drugas diin 2,700 ka suspetsado usab ang nadakpan sa mga operatiba sa PRO-7.
Matud ni Police Lieutenant Colonel Gerard Ace Pelare, tigpamaba sa PRO-7 nga dinhi makita kong unsa ka agresibo ang pakigbatok sa kapolisan sa rehiyon-7 batok sa ilegal nga drugs. Ug ang maong kalamboan gumikan usab kini sa komunidad nga nagpakabana kinsa nitaho ug nihatag og impormasyon ngadto sa kapolisan diin niresulta kini sa pagdeklara sa Regional Oversight Committee on Barangay Drug Clearing pinangulohan sa Philippine Drug Enforcement Agency (PDEA)-7 sa 62 porsyento ka mga barangay sa Central Visayas nga drug cleared.
Gihingusgan usab sa PRO-7 ang ilang drug demand reduction strategy pinaagi sa barangay drug clearing operations.
Samtang ang Lapu-Lapu City Police Office (LCPO) adunay 35 ka tawo nga nalambigit sa ilegal nga drugas ug ilegal nga sugal ang nasikop sa usa ka semana nilang Simultaneous Anti-Criminality Law Enforcement Operation (SACLEO) nga nagsugod sa Mayo 11 hangtod sa Mayo 17, 2024.
Sa laing bahin , gipasakaan na og kasong kalapasan sa Section 5 ug 11, Article II sa Akta Republika 9165 kun “Comprehensive Dangerous Drugs Act of 2002” ang 29-anyos nga lalaki nga nadakpan atol sa buy-bust operation sa City Intelligence Unit sa Cebu City Police Office(CCPO) sa niaging adlaw sa Sitio Manga, Barangay Tisa, Siyudad sa Sugbo.
Ang suspetsado residente kini sa Barangay Punta Princesa niining siyudad. Nasakmit gikan sa suspetsado ang 50 gramos nga shabu nga nagkantidad og P340,000, pitaka ug uban pa. (BANAT NEWS)
- Latest
