Uyoan nga nikulata sa 7-anyos gikasohan

CEBU, Philippines — Gipasakaan na og kaso ang 24-anyos nga uyoan nga midagmal sa 7- anyos niini nga pag-umangkon niadtong Domingo, Mayo 19, 2024 sa Barangay Labangon, Siyudad sa Sugbo base sa impormasyon nga gihatag sa Labangon Police Station sa Cebu City Police Office (CCPO).

Matud ni Police Major Eraño Regidor, hepe sa Labangon Police Station nga kagahapong adlawa, Mayo 21 gipasaka na ang kasong kalapasan sa Republic Act 7610 kun physical assault batok sa suspetsado nga nagtingkagol karon sa prisuhan.

Kahinumdoman gi-post sa iyaan sa bata ang CCTV footage nga gibunal-bunalan ang bata ug gituohang lipak sa kawayan.

Madungog ang paghilak ug pagsiyagit sa bata sa kasakit sa pagbunal kaniya sa uyoan nga nasuko kay natukmod niya ang anak sa suspek.

Nakaangkon nga 7-anyos nga bata og bun-og sa lawas gani miluta sa iyang likod ang samad agi sa hinapsan sa gituohang lipak sa kawayan.

Ang maong hitabo nakaabot sa barangay ingon man ni Cebu City Acting Mayor Raymond Alvin Garcia kinsa personal nga miadto sa police station ug mimando nga seguraduhon gyud nga mapapasakaan og kaso ang suspek ug wala'y mahitabong settlement sa kaso.

Hugot sab ang baruganan sa iyaan sa bata nga maoy nag-upload sa video nga mosang-at gyud og kaso batok sa suspek nga bana sa igsuon sa inahan sa bata aron mahatagan og hustisya ang nahitabo sa iyang pag-umangkon. 

Si DSWD-7 Regional Director Shailane Lucero miingon nga basi sa nakita nila sa CCTV footage klaro nga nakalapas gyud sa balaod ang suspek.

“Kay naa baya tay balaod nga nag protect sa mga bata under the Child Abuse law, kinahanglan dili gyud nato dapatan or any forms of abuse sa atong mga kabantan-onan,” matud ni Lucero.

Sa pagsulat niini nga balita, si Lucero nagkanayon nga mapasalamaton sila sa kalamboan sa kaso. Ang bata gipaubos na sa pag-atiman sa iyang maternal grandparents samtang ang suspek napasakaan na og kaso.

“But what we are looking now is monitoring sa kondisyon sa bata kay naa may labhag, so atong gitan-aw ang mga medical interventions,” matud ni Lucero.

Matud ni Lucero na trauma ang bata mao nga kinahanglan nila kining monitoron bisan naa na kini sa iyang mga apohan karon.

Susihon sab sa social workers ang kapabilidad ug kapasidad sa mga apohan kun kaya nilang atimanon ang bata gikan sa emosyonal nga panginahanglan, pinansyal ug pisikal. Kun di haum ang mga apohan kinahanglan silang mangita sa sunod nga paryente.

Apan kun wala gyuy makahatag og maayong kaugmaon sa bata, ang DSWD andam moatiman sa bata.

“I think taas kaayo ang risk sa bata kung nag atiman dili direkta iyang ginikanan? Kay pareha ana naay mga gamay nga sipyat, kay ang bata baya muduwa… that is just a unique feature of the child,” matud pa ni Lucero.—  IBM BANAT NEWS