Bisan sa balisbisan lang

Bisan asa nga angulo nimo tan-awa dili gyud makiangayon ang gibuhat sa mga tagdumala sa Vicente Sotto Memorial Medical Center nga pag-abog sa mga nagbantay og pasyente hinungdan nga daghan nila ang napugos paghigda daplin sa karsada gawas sa compound sa tambalanan nga gipanag-iya sa gobyerno.

Nakasabot ko nga dunay polisiya ang tambalanan aron makontrolar ang gidaghanon sa mga magbantay og pasyente ug aron sab malikayan ang posibling tinakdanay sa sakit. Apan ang maong polisiya angayang kutob lang sa mga ward ug kwarto sa tambalanan.

Nganong hangtod sa compound did-an man ang mga bantay sa pasyente nga makapangita og dapit nga ilang kapahuwayan samtang nagbantay sa ilang pasyente? Syaro naman pud og dili makahatag og konsiderasyon ang kadagkuan sa tambalanan nga makapangita og bakanti nga luna sulod sa compound alang sa mga bantay sa pasyente inay nga pasagdan sila nga mangligdas daplin sa karsada.

Lisod intawon ang kahimtang sa ubang mga nagbantay og pasyente labi pa niadtong gikan sa mga lagyong dapit. Dili sab mahimo nga usa ra gyuy mobantay sa pasyente tungod kay kinsa may mahabilin og dunay kinahanglang paliton nga tambal ug ubang kinahanglanon sa pasyente?

Simple ra gyud kaayo ang gipangayo sa mga nagbantay og pasyente---duna lang silay kapasilongan nga luwas sulod sa compound. Wala man sila mangayo og aircondition nga kwarto ug hunol-hunol nga higdaanan. Alang sa mga nagbantay og pasyente, bisan og anha lang sa balisbisan sa tambalanan basta luwas lang gikan sa piligro nga maligsan daplin sa karsada.

* * *

Nalipay ko sa nahimong reaksiyon sa Kapitolyo sa sitwasyon sa mga nagbantay og pasyente sa VSMMC. Si Gobernador Pamela Baricuatro miangkong duna nay gihimo ang probinsiya pagtabang sa problema sanglit sagad sa mga apektado niini mga molopyo sa probinsiya.

Sigun sa gobernador, duna nay luna nga gitagana ang Kapitolyo nga magsilbing kapahuwayan sa mga nagbantay og pasyente sa VSMMC. Gawas niini gipaspasan sab sa Kapitolyo ang pagpalambo sa mga provincial ug district hospitals aron dili na kinahanglang dad-on dinhi sa syudad ang mga pasyente gikan sa kalungsoran.

Ang sitwasyon sa VSMMC maoy sakit nga kamatuoran sa napasagdan nga mga tambalanan sa probinsiya sulod sa dugay na nga katuigan. Way lalis nga kun nahatagan pa og igo nga pagtagad ang pagpalambo sa mga tambalanan sa kalungsoran kaniadto, maminusan unta ang gidaghanon sa mga pasyente nga kinahanglang dad-on diha sa VSMMC.