EDITORYAL — Murag libudsuroy

Hagbay ra kaayo ning talan-awon sa Vicente Sotto Memorial Medical Center nga kanang mga magbalantay sa mga pasyente anha sa gawas mangligdas og higda, expose kaayo sa tanang elemento ug peligrong maoy sunod nga masakit.

Sa una ingon ana na ang sitwasyon sa VSMMC, ang mga bantay sa pasyente ilabi na kadtong bag-o pang gidala ug naa pa sa emergency room (karaang ER nga nag-atubang pa sa dalan B. Rodriguez) anha gyud sa gawas duol sa pultahan magpundo o magpaabot kung tawgon sa medical staff.

Dili lang kay karon ra ni nabalita, nabalita na kini sa una. Makadaghan na sab nagpagawas og mga pamahayag ang mga tagdumala sa VSMMC bahin ana ug makadaghan na sab naay gisaad ang Kapitolyo kun unsaon pagpagpangita og solusyon.

Apan makapila na nag-ilis og administrador sa VSMMC, makapila na ka termino ang mga galingkod  sa Hunta Probinsyal ug mga gobernador pero wala gihapoy mapasilongan ang mga tagtungod sa mga pasyente hangtud karon.

Ang eksplinasyon sa VSMMC human nigawas sa balita ,  para ni sa kaluwasan ug kaayohan sa tanan.  Usa ra gyuy tugotang pasudlon para ubanan ang pasyente.

Tungod kay ang hospital, sa kadaghan sa mga pasyente nga dunay lain-laing mga sakit ug naa sa peligro ang mga kinabuhi, kinahanglang magpabiling sterile o limpyo ug walay kagaw sa palibot tungod kay peligro kining maoy hinungdan sa impeksyon sa mga pasyente sa sulod.

Kung daghan sab ang mga tawo, dako kaayo ang tsansang makakuha sila og sakit gikan mga masakiton nga gitambalanan, posible sab silay maoy magdala og kagaw gikan sa gawas ug mabutang sa peligro ang mga pasyente nga hinay na ang panglawas.

Ang angay molihok ana para dili murag mga libud-suroy sa aseras walay lain kondili ang mga local government units kun diin sila gikan.

Nasayod man gyud ang mga LGUs nga dili lalim para sa tanan nilang mga konstituwente nga magdala og pasyente sa VSMMC sa Cebu City nga walay mga paryente sa siyudad, dapat sila nay motabang kanila.

Gawas sa LGUs, naa silay mga board members ug mga kongresista nga angay motabang pagpangita og solusyon.