Wake-up call

Grabe ka hasol ang dala sa halapad nga haze nga misakop sa Cebu gikan sa sunog sa kalasangan sa Indonesia.

Nagresulta kini sa suspension sa klase sa mga tunghaan sa Metro Cebu sa niaging semana.

Ang maong sitwasyon nagpakita lamang nga ang epekto sa transboundary pollution dili lang problema sa usa ka nasud diin kini nagsugod kondili hulga usab kini sa katawhan sa silinganang kanasuran.

Sa atong nakita, limitado ang pagresponde sa gobiyerno. Kulang ang koordinasyon sa mga lokal ug nasyonal nga ahensiya sa kagamhanan.

Ang suspension sa klase usa ka immediate nga lakang, apan wala’y klaro ang mga advisory sa kahimsog, transportasyon, ug public safety.

Ang katawhan nagkinahanglan og timely nga impormasyon ug preventive measures, dili lang reactive nga desisyon gikan sa mga ahensiya sa kagamhanan.

Ang haze nagdala og risgo sa respiratory health sa katawhan. A

pan ambot kon naka-distribute ba ang kagamhanan og mga facemask, aduna bay konkretong public health advisory ug koordinasyon sa mga lokal ug nasyonal nga mga ahensiya.

Hinaut nga sa sunod, adunay:

• Early warning system nga makahatag og timely alerts sa publiko.

• Health advisories nga klaro ug accessible, lakip na ang pagdistribusyon sa protective gear.

• Koordinasyon sa LGU ug DOH aron paggiya sa suspension sa klase ug trabaho.

• Regional cooperation sa ASEAN aron masiguro nga ang cross-border pollution dili magpadayon nga walay accountability.

Usa ka wake-up call paglaganap sa haze sa Cebu ug ubang lugar sa nasud. Ang gobiyerno kinahanglan adunay atomatik nga lakang pag-react, pagplano ug pagpatuman sa preventive ug coordinated nga mga lakang.