Nagwara-wara og armas sikop

CEBU, Philippines — Nabalhog sa prisohan ang usa ka 54-anyos nga lalaki human gialarma nga armado diha sa Barangay Balud, Lungsod sa San Fernando niadtong Sabado sa sa hapon, Hunyo 14, 2025.

Ang suspetsado mao si Joulito Tabalba Candilanza, walay trabaho, residente sa Barangay Ilaya sa maong lungsod.

Ang San Fernando Police Station nakadawat kini og report kabahin sa presensiya sa armadong tawo diha sa lugar nga nahitaboan.

Ang kapolisan daling niresponde sa maong taho ug gikatahong naabtan nila ang suspetsado nga nagwara-wara sa armas niini ug nanghagit sa mga molabay nga mga tawo sa lugar.

Giduol sa mga polis ang suspetsado apan giingong wala dayon kini ni-cooperate sa kapolisan.

Apan ang kapolisan nakakita og higayon sa pagsignit sa suspetsado.

Ang suspetsado napakyas sa pagpakita og dokumento sa iyang armas hinungdan nga gidalhan kini sa kapolisan ug gibalhog sa prisohan.

Na-recover sa kapolisan gikan sa suspetsdo ang usa ka kalibre .38 nga revolver nga adunay usa ka buhing bala ug usa ka fired cartridge.

Ang suspetsado mag-atubang kini og tukmang kaso sa nahimo niyang kalapasan. — /BDB (BANAT NEWS)