Online gamer gipusil

CEBU, Philippines —  Usa ka online gamer ang nalandig sa tambalanan human kini gipusil sa wala mailhing mga lalaki diha sa ganghaan sa usa ka condominium  sa Soong 1 sa Barangay Mactan Biyernes sa kaadlawon Hunyo 13, 2025. Si Police Lieutenant Colonel Christian Torres,  tigpamaba  sa LCPO miingon nga hangtud karon wala pa silay kongkretong impormasyon bahin sa nahitabo.

Apan base sa inisyal nga nakuha nilang impormasyon, gibabagan sa gwardiya sa maong condominium ang biktima nga luwan og motor kay gusto kining mosulod.

Gipangayoan kini og ID tungod kay di man kini tenant didto apan kalit lang nga dunay nadungog nga buto-buto sa armas ug nahagba kini sa ubos.

Matud pa ni Torres nga tinguha nila karon nga makakuha og kopya  sa  footage  sa CCTV camera sa maong condominium sa pagsuta sa tinuod  nga nahitabo.

Ang biktima naa karon sa usa ka pribadong tambalanan sa siyudad apan dili pa nila mahinabi hangtod niining mga panahona.

Dunay garbage collector sa lugar nga gikatahong nakakita sa hitabo  nga miingon nga dunay mga wala mailhing tawo nga nagpusil sa biktima ug daling misibat sakay sa motorsiklo.

Si Torres miingon nga duha ka anggulo ang ilang gisubay sa maong pagpamusil , personal nga kasuko ngadto sa biktima ug ang ikaduha ang posibleng kalambigitan sa ilegal nga drugas.

Sa laing bahin, usa ka 46 anyos nga lalake ang gidakop  tungod sa pagdala dala og armas diha sa Unit 4, Oprra, Barangay Kalunasan, Siyudad sa Sugbo niadtong Biyernes sa hapon, Hunyo 13, 2025.

Ang suspetsado mao si Ernesto Sumalo Fondales, 46,taga Unit 4, Oprra, Barangay Kalunasan ning siyudad.

Niresponde ang mga personnel sa City Intelligence Unit Cebu City Police Office pinangulohan ni Police Captain Christopher Irwin Sanchez sa report sa presensiya sa armadong tawo sa lugar.

Nasakmit sa otoridad ang usa ka kalibre .38 revolver nga dunay duha ka   bala.